Iemen qarýly kúshteri bir táýlikte hýsıtterge qarsy 133 operatsııa júrgizdi
ASTANA. KAZINFORM — Iemen qarýly kúshteri sońǵy 24 saǵat ishinde eldiń ártúrli aımaǵyndaǵy «Ansarýlla» qozǵalysynyń (hýsıtter) pozıtsııalary men nysandaryna qarsy 133 operatsııa júrgizdi. Bul týraly Iemen qarýly kúshteriniń ókili, polkovnık Madjıd Abdalla an-Nazılı AQSh-tyń X áleýmettik jelisindegi paraqshasynda málimdedi, dep habarlaıdy Anadoly.
An-Nazılıdiń aıtýynsha, soqqylar maıdan shebiniń ártúrli ýchaskelerindegi hýsıtterdiń pozıtsııalaryna jasalǵan. Operatsııalar barysynda ushqyshsyz ushý apparattary, artıllerııa jáne dúrkin-dúrkin atylatyn zymyran júıeleri qoldanylǵan.
Al Iemenniń resmı SABA agenttiginiń habarlaýynsha, Saýd Arabııasynyń astanasy Er-Rııadta Iemen prezıdenttik basqarý keńesiniń tóraǵasy Rashad ál-Alımı bastaǵan jıyn ótti. Oǵan keńes músheleri men joǵary laýazymdy tulǵalar qatysty.
Jıynda Iemen premer-mınıstri Shaı Mohsen áz-Zındanı de boı kórsetti. Kezdesýde sońǵy ýaqytta hýsıttermen qaqtyǵystardyń jıilep ketýi talqylandy.
Kezdesý qorytyndysy boıynsha hýsıtterdiń shabýyldaryna baılanysty áskerdiń joǵary jaýyngerlik ázirligin saqtaý týraly sheshim qabyldandy. Sondaı-aq qozǵalysqa qarsy áýe soqqylary men zymyrandyq operatsııalardyń qarqynyn arttyrý josparlandy.
Buǵan deıin Birikken Ulttar Uıymy Iemende qaýipsizdik jaǵdaıy nasharlaǵanyn málimdeǵan bolatyn.
