IEMEN: BUU jarııalaǵan beıbit bitim 2 saǵattan soń qaıta buzyldy
ASTANA. QazAqparat - Saýd Arabııasy bastaǵan koalıtsııa Iemen astanasyn taǵy bombanyń astyna aldy. Búgin ǵana BUU gýmanıtarlyq bitim jaıynda resmı málimdemeni jarııalaǵan edi. Ekijaqty kelisim kúshine engenine 2 saǵat ótpeı jatyp qaıta buzyldy, dep habarlaıdy 24.kz.
Jergilikti turǵyndar joıqyn jarylystar bolǵanyn aıtady. Beıbit bitim 11 shilde kúni tún ortasynan qasıetti Ramazan aıy aıaqtalatyn 16 shildege deıin jarııalanǵan edi. Osy merzim ishinde 3 aıǵa ulasqan azamattyq soǵys pen áýe shabýyldarynan japa shekken 21 mln turǵynǵa kómek kórsetilýi kerek edi. Biraq bul bitimge ıemendikter áý bastan-aq kúpti kóńilmen qarap baqty.
Iemendegi soǵysty toqtatý týraly birinshi 5 kúndik bitim mamyrda jarııalanǵan bolatyn. Ol kezdegi beıbit kelisimdi hoýsıtter buzdy. Al bul joly olar arab koalıtsııasyn aıyptap otyr. Iemendegi azamattyq soǵys shıittik búlikshiler - hoýsıtter men súnnıttik bıliktiń qarýly kúshteri arasynda bolyp jatyr.
Saýd Arabııasy jetekshilik etetin birneshe arab elderiniń koalıtsııa áskeri hoýsıtter bekingen jerlerdi 26 naýryzdan beri bombalap keledi. Biraq áýe shabýyldarynan kóp jaǵdaıda beıbit halyq qyrylyp qaldy. Sońǵy málimet boıynsha, qurbandar sany 3 myń adamnan asqan. Al mıllıonnan astam ıemendik bosqynǵa aınaldy.
