Iemen azamat soǵysynyń aldynda tur
ASTANA. 2 maýsym. QazAqparat - Iemende úkimet áskerleri men yqpaldy taıpa kósemi sheıh Sádek ál-Ahmardyń jaqtastary arasyndaǵy qaqtyǵys kúnnen-kúnge ýshyǵyp barady. Baqylaýshylardyń pikirinshe, bul el azamat soǵysynyń aldynda tur, dep habarlaıdy Euronews.
Taıaýda Iemen astanasy Sanadaǵy atysta 40 adam qaza tapqany týraly habarlandy. Ál-Ahmardyń jaýyngerleri prezıdentke adal berilgen áskerlerge qarsy jańa shabýyldar jasaýdy bastap, ótken aptada birneshe memlekettik mekemeni, onyń ishinde qaýipsizdik kúshteriniń shtab-páterin basyp alǵan bolatyn.
Taız jáne Zınjıbar qalalarynda da qarýly qaqtyǵystar boldy. Onda da qurban bolǵandar bar.
Qarsy kúresip jatqan taraptar jeńil qarýdan bólek iri kalıbrli pýlemetter men granata atqyshtar qoldanýda.
Iemende aqpanda bastalǵan jappaı halyq tolqýlarynan qazirdiń ózinde júzdegen adam qaza tapty.
