Iemen astanasy mańynda Saýd Arabııasynyń joıǵysh ushaǵy atyp túsirildi
ASTANA. QazAqparat - Iemen astanasy Sana mańyndaǵy Banı Haret okrýginde Saýd Arabııasy ÁÁK-iniń F-16 joıǵysh ushaǵy atyp túsirildi, dep habarlady Tvıtterdegi paraqshasynda "Yemen Post" basylymy, dep jazdy Rosbalt.
Oqı ornynda túsirilgen sýretterdiń birinde órtenip jatqan ushaq bólikteri, taǵy birinde "Saýd Arabııasynyń koroldik ÁÁK" degen jazbasy bar joıǵysh bólshegi beınelengen.
"Saýd Arabııasynyń F-16 ushaǵy Banı Haret mańynda atyp túsirildi. Ushqyshtyń qaıda ekeni belgisiz", - delingen habarlamada. Redaktsııa ushaq qulaǵan jerden hýsıtter jarylmaǵan eki snarıad tapqanyn atap ótti. Oqıǵany ázirge Saýd bıligi resmı túrde rastamady. Newsru.co.il basylymy apattyń bolǵanyna kúmándanyp otyr: «Saýd ÁÁK-inde F-16 ushaǵy joq, olarda F-15 joıǵyshtary bar», dep jazylǵan basylymda. 10 mamyrda Iemendegi sodyrlar "arab koalıtsııasynyń" ushaǵyn joıǵan, ol Marokko ÁÁK-ine tıesili edi. Shamamen eki aı buryn Saýd Arabııasy aldymen Bahreın, Katar, Kýveıt jáne BAÁ ÁÁK-iniń qoldaýymen, keıin Mysyr, Iordanııa, Marokko jáne Sýdan ÁÁK-iniń kómegimen Iemendegi bılikti jaýlap alǵan hýsıtterge qarsy áýe operatsııasyn bastady.
