Ydysyn fontan sýyna jýǵan balmuzdaq satýshysy jalǵan qujattarmen jumys istegen
ASTANA. QazAqparat - Elordada ydysyn fontan sýyna jýǵan balmuzdaq satýshysy jalǵan qujattarmen jumys istegendigi anyqtaldy, dep habarlaıdy QazAqparat qala ákimdiginiń baspasóz qyzmetine silteme jasap.
Qarapaıym sanıtarlyq normalardy saqtamaı, Astana qalasynyń qyraǵy turǵynymen áshkere bolǵan balmuzdaq satýshysynyń saýdamen aınalysýǵa quqyǵy bolmaǵan. Bul týraly qalalyq kásipkerlik jáne ónerkásip basqarmasy basshysynyń orynbasary Rýslan Ydyrysov málimdedi.
Jýyrda Tımýr Orazaqov esimdi azamat Astananyń dál ortalyǵynda balmuzdaq satýshynyń qasyqty fontan sýyna jýyp turǵany kórsetilgen vıdeony áleýmettik jelige júktegen bolatyn. Az ýaqyttyń ishinde vıdeony myńnan astam adam kórip, yzaly pikirlerin qaldyrdy.
«Tekserý nátıjesinde áıeldiń jalǵan qujattarmen jumys istegendigi anyqtaldy. Ol usynǵan qujattar basqa kásipkerge tıesili bolyp shyqty. Alaıda, biz ol kásipkerge barǵanymyzda, bul saýda núktesi oǵan tıesili emestigin jáne «Nurly jol» býlvarynda balmuzdaq satýshyny múlde tanymaıtyndyǵyn alǵa tartty», - deıdi R.Ydyrysov.
Bul rette, Qoǵamdyq densaýlyq saqtaý komıteti azamattardy kúmándi saýda oryndarynan azyq-túlik ónimderin satyp almaý jóninde eskertedi.
Sonymen qatar, 1 shildeden bastap, «Nurly jol» býlvary men Esil ózeniniń jaǵalaýynda saýda jasaıtyn kóshe saýdagerleri úshin biryńǵaı kıim úlgisin engizý josparlanyp otyr. Biryńǵaı kıim úlgisi zańdy kásipkerlerdi zańsyz kásipkerlerden aıyrýǵa múmkindik bermek.
