Ydyrysov Elbasyna Qazaqstannyń BUU Qaýipsizdik Keńesine músheligi aıasyndaǵy jumystar týraly baıandady

ASTANA. QazAqparat - Qazaqstan Respýblıkasynyń Prezıdenti Nursultan Nazarbaev Syrtqy ister mınıstri Erlan Ydyrysovty qabyldady, dep habarlaıdy Aqordanyń baspasóz qyzmeti.

Kezdesýde E.Ydyrysov Memleket basshysyna 2017 jylǵy qańtarda bastalatyn Qazaqstannyń BUU Qaýipsizdik Keńesine músheligi aıasyndaǵy jumystarǵa ázirlik barysy týraly baıandady.

Elbasy syrtqy saıası qyzmetti atqarý kezinde respýblıka táýelsizdiginiń 25 jyldyǵyna basa nazar aýdarý qajettigin atap ótti.

- Eldiń halyqaralyq arenadaǵy bedelin arttyrý úshin elshilerimiz 25 jylda qol jetkizgen jetistikterimizdi, sonyń ishinde Qazaqstannyń respýblıkadan tys jerlerdegi beıbitshilik pen tynyshtyqty saqtaý isine qosqan úlesin sheteldik qoǵamdastyqqa kórsetýge tıis, - dedi Nursultan Nazarbaev.

Sonymen birge, Memleket basshysy elimizge sheteldik resmı delegatsııalardyń kelýiniń mańyzdylyǵyn aıtty.

Qazaqstan Prezıdenti aldaǵy BUU Qaýipsizdik Keńesine múshelik aıasynda ótkiziletin is-sharalardyń basymdyǵy bar baǵyttaryna toqtalyp, bul mártebeli mindet álemdik qoǵamdastyqtyń aıryqsha seniminiń kórinisi bolyp sanalatynyn jetkizdi.

Syrtqy ister mınıstri Qaýipsizdik Keńesindegi qyzmetke daıyndyq belsendi túrde júrgizilip, turaqty komıtetterge basshylyq jasaý mindetteriniń bólinip berilip jatqanyn málimdedi.

Budan bólek, E.Ydyrysov respýblıka táýelsizdiginiń 25 jyldyǵy aıasynda asa mártebeli meımandar qatysatyn halyqaralyq konferentsııa ótkizý josparlanyp otyrǵanyn málimdedi.

Syrtqy saıasat vedomstvosynyń basshysy Qazaqstan Prezıdentin aldaǵy halyqaralyq is-sharalar, sonyń ishinde basym bóligi «EKSPO-2017» halyqaralyq kórmesin ótkizýge baılanysty bolatyn sharalar týraly habardar etti.

Nursultan Nazarbaev kezdesý qorytyndysy boıynsha birqatar naqty tapsyrma berdi.