Ybyraı Jaqaevtyń taqııasy men ketpeni Astanaǵa «jol tartty»

Osyǵan deıin Astana jáne Almaty qalalarynda eldiń qolyndaǵy jádigerlerdi jınap, «Ulttyq mýzeıge syı tartý» atty aktsııanyń tusaýyn kesken. Burnaǵy kúni osy ıgi shara Qyzylorda oblysynda jalǵasyn tapty, dep jazady «Egemen Qazaqstan» basylymy.

Sharaǵa Qazaqstan Ulttyq mýzeıiniń dırektory Darhan Myńbaı men Qyzylorda oblysy ákiminiń orynbasary Raýan Kenjehanuly qatysty. Ulttyq mýzeıge syı tartýǵa Sotsıalıstik Eńbek Erleri Shyrynkúl Qazanbaeva men Sálıma Jumabekovalar arnaıy keldi. Іltıpatty sózin arnap, ózderi tutynǵan zattaryn tartý etti. Máselen, Shyrynkúl Qazanbaeva osydan elý jyl buryn óz qolymen toqyǵan kilemin berse, Sálıma Jumabekova ózi kıgen qamzolyn syılady. Sonymen qatar, sharaǵa Turmaǵambet Іztileýov, Ybyraı Jaqaev, Ulbala Altaıbaeva, Zeınolla Shúkirov, Asqar Toqmaǵambetov, Dúkenbaı Dosjan, Batyrhan Shúkenov syndy, t.b. ultymyzdyń birtýar perzentteriniń urpaqtary men týǵan-týystary qatysyp, olardyń qoldanǵan qundy jádigerlerin Ulttyq mýzeıge tabystady. Solaısha, kezinde dala akademıgi atanǵan Ybyraı Jaqaevtyń taqııasy men ketpeni Astanaǵa jol tartty. Sondaı-aq, aktsııa aıasynda Syr óńiriniń týmalary, belgili kompozıtor Keńes Dúısekeev pen dańqty sportshymyz Ilıa Ilınniń jeke zattarymen qosa, jergilikti sýretshi, músinshilerdiń de týyndylary mýzeıge tartý etilmek. «Ulttyq mýzeıge syı tartý» aktsııasy bıylǵy naýryz aıynda Astanada Qazaqstan Respýblıkasy Ulttyq mýzeıinde saltanatty túrde bastaý alǵanyn aıta keteıik. Odan keıin maýsymda Almatyda jalǵasyn tapqan edi. Sol kezde Іlııas Jansúgirov, Tahaýı Ahtanov, Qanysh Sátbaev, Ózbekáli Jánibekov, Álkeı Marǵulan, Serke Qojamqulov, Ázilhan Nurshaıyqov, Erkeǵalı Rahmadıev, Ǵarıfolla Qurmanǵalıev, Káýken Kenjetaev syndy belgili tulǵalardyń urpaqtary, týystary qatysyp, olardyń kózi tirisinde qoldanǵan zattaryn Ulttyq mýzeı qoryna tapsyrdy. Osy ýaqytqa deıin Ulttyq mýzeıge barlyǵy - 918 zat tabystaldy. Qundy jádigerler búgin Syr óńirindegi azamattar tartý etken muralarmen tolyǵa tústi. Atalǵan shara týraly Qazaqstan Respýblıkasy Ulttyq mýzeıiniń dırektory Darhan Myńbaı bylaı deıdi: «El ishi - óner kenishi». Jurttyń sandyǵy men shkafynda, shatyry men jertólesinde áli ashylmaǵan, ǵylymı aınalymǵa túspegen nebir qundy jádigerler tur. Ony «babamnyń babasynyń kózi» dep, eshkimge aıtpaı, kórsetpeı ustaý arqyly saqtaımyz dep oılaıdy. Al shyndyǵynda, betin aýlaq qylsyn, onyń ottan-sýdan saqtandyrylmaǵany bylaı tursyn, kez kelgen zat bıologııalyq ózgeristerdiń saldarynan jyldan-jylǵa jo­ıyla beredi. Jádigerdiń bútin qalpyn tek birneshe urpaǵy ǵana kórýi múmkin. Kádimgideı jylmen eseptegende, 50-70 jylda jeke azamattyń qolyndaǵy buıym, zat joıylyp otyrady. Árkim óz otbasyndaǵy qadirli buıym týraly oılanyp kórsinshi, sonyń kóbi joǵalǵan, joıylǵan nemese qoldy bolǵan. Sondyqtan, «kez kelgen mura mýzeıde saqtalyný kerek» degen eldik ustanymdy jalpyhalyqtyq paryz sanaýdyń ýaqyty týdy dep sanaımyn. Mýzeıge laıyqty buıymdy, zatty, qujatty eksponat retinde qorǵa tapsyrýdyń ózi Qazaqstannyń kez kelgen azamaty úshin abyroı, dáreje bolatyn kún de alys emes. Bul álemde bar úrdis». Shara maqsaty - ulttyq tarıhı-mádenı muramyzdy saqtaý máselesine qoǵam nazaryn aýdarý. El arasynda eleýsiz jatqan tarıhı mańyzy zor qundy zattardy, ultymyzdyń iri tulǵalarynyń jádigerlerin kásibı turǵyda saqtaýǵa jáne kópshilik nazaryna usyný úshin Ulttyq mýzeıge tapsyrýǵa úndeý.