Ybyraı Jaqaev aýylynda kúrish ósirý tarıhyna arnalǵan murajaı ashyldy
ASTANA. QazAqparat - 22 qazan kúni eki márte Sotsıalıstik Eńbek Eri, aq kúrishtiń atasy Ybyraı Jaqaevtyń 125 jyldyq mereıtoıy Qyzylorda oblysynyń Shıeli aýdanynda jalǵasyn tapty, dep habarlaıdy QazAqparat aımaq basshysynyń baspasóz qyzmetine silteme jasap.
Saltanatty sharaǵa Qyzylorda oblysynyń ákimi Qyrymbek Kósherbaev, Sý resýrstary komıtetiniń basshysy Islam Ábishev, sondaı-aq, QR Parlamenti Májilisi jáne Senatynyń depýtattary, mádenıet qaıratkerleri jáne respýblıkanyń qurmetti azamattary qatysty.
Shıeli kentindegi Ybyraı Jaqaev eskertkishine oblys ákimdigi men máslıhatynyń, oblystyq ardagerler keńesiniń jáne aımaq dıqandarynyń atynan gúl shoqtary qoıyldy. Sodan soń Ybyraı Jaqaev atyndaǵy aýylda kúrish ósirý tarıhy murajaıy ashyldy. Oblys ákimi murajaıǵa kúrish dánderinen jasalǵan kartına syıǵa tartty. Murajaı qorynda 10 myń eksponat saqtaýly, onyń ishinde Jaqaevtyń ózi tutynǵan zattary men jumys quraldary bar. Sonymen qatar Shıeli kentinde qurmetti azamattar alleıasy ashyldy.
«Altyn dán-2016» saltanatty jıynynda oblys ákimi Qyrymbek Kósherbaev qyzylordalyq dıqandardy tabysty eńbek jylymen quttyqtady. Sondaı-aq aımaq basshysy QR UǴA akademıgi, Shıeliniń týmasy Dosmuhammed Kishibekovty 90 jyldyǵymen quttyqtap, oǵan jeńil avtokóliktiń kiltin tabystady.
Munymen qosa, Ybyraı Jaqaevtyń mereıtoıynyń qurmetine respýblıkalyq aqyndar aıtysy, qazaq kúresinen týrnır jáne qazaqstandyq estrada juldyzdarynyń qatysýymen gala-kontsert ótti.
