Ybyraı Altynsarınniń jeke buıymdary men túpnusqa qoljazbalary elorda mýzeıine qoıyldy
Kóshpeli mýzeı uly aǵartýshynyń 180 jyldyq mereıtoıyna oraı, elimizdiń kóptegen óńirlerinde uıymdastyrylady.
«Búgingi kórmege Qostanaıdaǵy Ybyraı Altynsarın mýzeıinen jáne Arqalyq pedagogıkalyq ınstıtýty janynan qurylǵan mýzeıden alynǵan 50-ge jýyq jádiger qoıylyp otyr. Onyń ishinde Ybyraı Altynsarınniń otbasy qoldanǵan turmystyq buıymdar, et jegen tabaǵy, qymyz ishken tostaǵany, ózi jazǵan «Sharıǵatýl-ıslam» kitabynyń túpnusqasy bar. Sondaı-aq Y. Altynsarın ashqan mektepterdiń qońyraýlary men irgetasyna qoıylǵan kirpishteri de kópshilik nazaryna usynylyp otyr», - dedi Qostanaı oblystyq Ybyraı Altynsarın memorıaldyq mýzeıiniń basshysy Marǵulan Ospanov kórmeniń ashylý saltanatynda.
Kórmede HІH ǵasyrdaǵy mektep úlgisi kórsetilgen. Onda taqtaǵa jazylǵan 1864 jyldyń 8 qańtary – Torǵaı mektebiniń ashylǵan kúni edi. «Osy jyly qańtardyń 8-i kúni kópten kútken isim ornyna kelip, mektep ashyldy. Oǵan 14 qazaq balasy kirdi. Bári de jaqsy, esti balalar. Men balalardy oqytýǵa qoıǵa shapqan ash qasqyrdaı qyzý kiristim», – dep jazǵan Y. Altynsarın belgili shyǵystanýshy, professor N.I.Ilmınskııge joldaǵan hatynda.
Sonymen birge, Ybyraıdyń naǵashy atasy Shegen bıdiń portreti men shapany, aǵartýshynyń ádebı muralary men etnografııalyq ocherkteri jáne arhıvtik fotoqujattar, Y. Altynsarınniń ómiri men qyzmeti týraly kitaptar, kesenesi men mýzeıiniń maketteri, jańa tásil – aǵartýshynyń gologrammasy qoıylǵan.
Kóshpeli kórmeni Nur-Sultan qalasynyń turǵyndary men qonaqtary 20 sáýirden 5 mamyr aralyǵynda tamashalaı alady.
Kórmemen qatar elordada Y. Altynsarınniń 180 jyldyq mereıtoıyna arnalǵan «Úmit etken kózimniń nury balam...» atty dóńgelek ústel men ybyraıtanýshy-ǵalym Serikbaı Ospanovtyń «Ybyraı joly» kitabynyń tusaýkeser rásimi ótti.
