Ybyraı Altynsarınniń 180 jyldyǵyna oraı halyqaralyq baıqaý jarııalandy

NUR-SULTAN. QazAqparat - «Otandastar qory» KEAQ-nyń Sheteldegi otandastardy qoldaý departamenti ulttyq sanany saqtaý jáne ultymyzdyń uly tulǵalaryn ulyqtaý arqyly óskeleń urpaqty rýhanı turǵyda damytý maqsatynda «Uly Dala ustazy» ataýymen halyqaralyq baıqaý jarııalaıdy, dep habarlaıdy QazAqparat.

Shyǵarmashylyq baıqaý qazaqtyń asa kórnekti aǵartýshy-pedagogy, jazýshy, etnograf, folklorshy, qoǵam qaıratkeri Ybyraı Altynsarınniń 180 jyldyǵyna arnalady.

«Uly Dala ustazy» halyqaralyq shyǵarmashylyq baıqaýy Facebook jáne Instagram áleýmettik jelilerine #Ustaz180 heshtegimen beınejazba júkteý arqyly (aýyzsha) jáne sonymen qatar elektrondyq poshtaǵa ([e-mail]) shyǵarma joldaý (jazbasha) ádisi boıynsha ótkiziledi. Baıqaýǵa 10 jastan bastap 18 jasqa deıingi sheteldegi jáne eldegi qandas oqýshylar qatysa alady.

Baıqaý sharty:

1. Ybyraı Altynsarın óleńderinen úzindi oqý (kemi eki-úsh shýmaq)
2. Ybyraı Altynsarınniń dara tulǵasyn aıshyqtap, uly ustazdy ulyqtaıtyn shyǵarma jazý (kemi bir bet - A4 formatta).

Baıqaý ótetin ýaqyt: 2021 jylǵy 1 qazan – 1 qarasha aralyǵy.

Baıqaý júldegerleri:

Júldeli 3 orynǵa «Baldáýren» respýblıkalyq oqý-saýyqtyrý ortalyǵyna, Nazarbaev zııatkerlik mektebiniń jazǵy lagerine jáne «Týǵan elge saıahat» týrıstik poıyzyna tegin joldama beriledi.

Júldeli oryndary:

I oryn - bireý;

II oryn - bireý;

III oryn - bireý;

Baıqaý qorytyndysy

Qazylar alqasynyń ádil irikteýinen ótken soń qarasha aıynyń alǵashqy kúninde jeńimpazdar anyqtalyp, úzdik úshtikke engenderdiń esimderi 2-qarashada jarııalanady.