Ybyraı Altynsarınniń 180 jyldyǵyna arnalǵan derekti fılmi efırge shyǵady

NUR-SULTAN. QazAqparat – Búgin, 5 qańtar saǵat 20:35-te «Qazaqstan» ulttyq telearnasy túsirgen aǵartýshy, ustaz Ybyraı Altynsarınniń ómiri men rýhanı murasyna arnalǵan «Ustaz» derekti fılmi efırge shyǵady, dep habarlaıdy QazAqparat tilshisi.

«Fılm avtorlary Orynbor shekara komıssııasynyń muraǵatynan patsha úkimetiniń qazaqtardy shoqyndyrý saıasaty qalaı bastalǵanyn kórsetetin materıaldardy tapty. Oqıǵa Ybyraı Altynsarın men orys mıssıoneri Ilmınskııdiń kezdesýin kórsete otyryp baıandalady. Fılmde Altynsarınniń jáne Ilmınskııdiń hattary - Ilmınskııdiń 1869 jyly aǵartý mınıstri D.Tolstoıǵa, Altynsarınniń 1889 jyly V. Katarınskııge jazǵan haty zerttelip, hrıstıan mıssıonerleriniń shynaıy pıǵylyn ashatyn úzindiler keltiriledi», - dep atap ótedi telearnadan.

Jobada sonymen birge Y.Altynsarınniń 1884 jyly shyqqan «Musylmanshylyqtyń tutqasy» atty eńbeginiń jaryq kórý tarıhy, Troıtsk qalasynda medrese ashylǵanda Altynsarınniń onyń salynýyna óz qaltasynan qarjylaı kómek bergeni baıandaldy. Muniń bári uly ustazdyń tek qazaqtyń emes, barsha túrki halyqtarynyń orasan zor qaıratkeri ekenin kórsetedi.

Joba avtory – jýrnalıst Darhan Ábdik. Derekti týyndy «Qazaqstan» arnasynan búgin saǵat 20:35-te efırge shyǵady.