Yazgı: Dımash Qudaıbergenniń túrik tilindegi alǵashqy áni qalaı ómirge keldi
ASTANA. KAZINFORM – Dımash Qudaıbergen tyńdarmandaryna túrik tilindegi alǵashqy avtorlyq týyndysy – Yazgı ánin usyndy. Bul týraly dimashnews.com jazdy.
Ánniń mýzykasyn Dımash Qudaıbergenniń ózi jazsa, sóziniń avtory – Órken Ábdirov. Kompozıtsııanyń mýzykalyq prodıýserligi, Dımash oryndaıtyn ózge de ánderindegi sııaqty, avtordyń tikeleı jetekshiligimen júzege asyryldy. Jańa týyndyny ázirleýge aranjırovşık Renat Aýbakırov pen saýnd-prodıýser Erlan Bekchýrın de atsalysty. Gıtara partııasyn Ábilmansur Qudaıbergen oryndady.
Tereń romantıkalyq mazmunǵa qurylǵan bul kompozıtsııa bir-birin súıgen eki jastyń taǵdyryn baıandaıdy. Bir aspan astynda taǵdyrlary toǵysqan qos ǵashyqtyń joly ár tarapqa bólinip, aralaryndaǵy bir ǵana qadam qashyqtyq tutas bir ǵumyrǵa sozylǵandaı áser qaldyrady.
Ánniń sózin jazǵan aqyn Órken Ábdirov shilde aıynyń ortasynda Dımashtyń túrik tilindegi lırıkalyq ánine mátin jazý jóninde usynys alǵan. Ol bul jumystyń úlken jaýapkershilik júkteıtinin birden sezingenin aıtty. Sonymen qatar túrik tilin meńgerýge túrik fılmderi men ánderiniń yqpaly zor bolǵanyn atap ótti.
- Túrik tilin alǵash ret L.N.Gýmılev atyndaǵy Eýrazııa ulttyq ýnıversıtetinde ustazym Qýanyshbek aǵaıdyń dáristerinde úırendim. Sol jerde túrik álipbıimen tanysyp, til úırenýdegi alǵashqy qadamdarymdy jasadym. Keıin ýnıversıtet uıymdastyrǵan jazǵy tildik kýrstardyń arqasynda Túrkııaǵa baryp, túrik tilimdi tabıǵı tildik ortada jetildirýge múmkindik aldym. Alaıda túrik tili men mádenıetine degen qyzyǵýshylyǵym budan da erterek qalyptasqan bolatyn. Buǵan Qazaqstanda keńinen tanymal ári Túrkııadan tys jerlerde de joǵary baǵalanatyn túrik fılmderi men ánderiniń yqpaly zor boldy. Shilde aıynyń ortasynda Dımashtyń túrik tilindegi lırıkalyq ánine mátin jazý jóninde usynys aldym. Bul jumystyń úlken jaýapkershilik júkteıtinin birden sezindim. Ánniń áýeni sol kezde daıyn bolatyn, al meniń mindetim sol áýendi mazmundy poetıkalyq mátinmen tolyqtyrý edi. Kompozıtsııanyń áýeninen muń, náziktik pen saǵynysh anyq sezilip turdy. Sondyqtan sózder áýenniń ózinen tabıǵı túrde týyndaǵandaı áser qaldyrdy, - deıdi aqyn.
Ol ánniń ataýyna kelgende uzaq oılanǵanyn aıtty.
- Mátin tolyq aıaqtalǵannan keıin ánniń ataýy jóninde uzaq oılandym. Nátıjesinde eki nusqa usyndym: Yazgı («Taǵdyr») jáne Ayrı Mevsim («Qabyspaıtyn jyl mezgilderi»). Sońǵy tańdaý Yazgı ataýyna tústi. Osylaısha taǵdyr qosylýǵa múmkindik bermegen ǵashyqtar týraly ǵazal dúnıege keldi. Ánniń sózin jazý barysynda túrik ádebıetin, ásirese túrik aqyndarynyń poezııasymen burynnan tanystyǵym kóp kómegin tıgizdi. Áýenniń emotsııalyq tabıǵatyn dál jetkizip, sonymen qatar oǵan tabıǵı úılesetin sózderdi tabý ońaı bolǵan joq. Osy ýaqytqa deıin tanymal qazaqstandyq ánshilerge arnalǵan ánderdiń mátini men mýzykasyn jazý tájirıbem boldy. Sonymen qatar óz oryndaýymdaǵy avtorlyq ánderim jáne qazaq, túrik tilderinde jazylǵan týyndylarym da bar. Sondyqtan ánniń sońǵy nusqasyn shamamen elestete aldym. Jınaqtalǵan tájirıbemniń barlyǵy osy kompozıtsııany jazý barysynda aıtarlyqtaı paıdasyn tıgizdi, - deıdi Órken Ábdirov.
Án óte romantıkalyq ári muńdy sıpatqa ıe. Aqyn osyndaı názik ári muńly joldardy jazýǵa ne sebep bolǵanyn aıtty.
– Qaı dáýirde bolmasyn, bir-birin shynaıy súıgenimen, taǵdyrdyń jazýymen birge bolý baqyty buıyrmaıtyn adamdar bolǵan jáne bola beredi. Olardyń júrekteri bir-birine umtylǵanymen, taǵdyr basqa sheshim qabyldaıdy. Olar bir aǵashta qatar ómir súretin kóktem men kúz sekildi nemese bir aspan astyndaǵy eshqashan túıispeıtin izder ispetti. Menińshe, bastalýy bolǵanymen, jalǵasy buıyrmaǵan osyndaı sezimderdiń taǵdyry Yazgı ániniń negizgi shabyt kózine aınaldy, - deıdi Órken Ábdirov.
Dımash DiMENSIONS atty jańa álemdik týrnesin jarııalaǵanyn jazǵan edik.
