ıAsaýı kesenesi arnaıy kúzettiń baqylaýyna ótedi

Túrkistandaǵy Qoja Ahmet ıAsaýı kesenesi arnaıy kúzet qyzmetiniń baqylaýyna ótedi. Bul jaıynda oblys ákimi Darhan Satybaldy Ortalyq kommýnıkatsııalar qyzmetinde ótken brıfıngide aıtty, dep habarlaıdy Kazinform.

«Ulttyq qaýipsizdik qyzmeti ıAsaýı kesenesin áldebireýler jaryp jibermekshi bolǵany týraly resmı habar taratqan edi. Sodan beri nysannyń qaýipsizdigin jetildirdińizder me? Kesenege qaýip tóngenin oblystyń qaýipsizdik organdary bilmeı qalǵan ba? Keseneni jarý kimge, ne úshin kerek boldy dep oılaısyz? Qazir ol nysanǵa ondaı qaýip tónip turmaǵanyna qandaı da bir kepildik bere alasyz ba?» – dep surady BAQ ókili.

Ákimniń sózinshe, keseneniń qaýipsizdigi qazir Úkimet deńgeıinde talqylanyp jatyr.

«Kepildikti eshqashan, eshkim bere almaıdy. Kim, ne oılap júrgenin eshkim bilmeıdi ǵoı?! Ondaı oqıǵa aqpan aıynda boldy. Ony ózim de BAQ arqyly bildim. Tájikstannyń ba, basqa eldiń azamaty sondaı is-qımyl jasaǵysy kelgen dep estidim. Endi olar basqa aǵymdaǵy azamattar shyǵar. Onyń kózqarasyn, nege ondaı sheshimge kelgenin bilmeımin. Keıbireýler «serik qosý, taǵy basqa nárseler» deıdi. Onyń ne úshin barǵanyn aıta almaımyn», – dedi aımaq basshysy.

Darhan Satybaldy kesene qaýipsizdigi boıynsha Úkimetke hat jazǵanyn da aıtty. Tarıhı oryn strategııalyq nysandar tizimine engennen keıin, onyń qaýipsizdik sharalary arnaıy kúzet qyzmeti arqyly iske asyrylady.