ıAsaýıdiń taǵlymdy oılary men hıkmetteri túrki halyqtarynyń baǵa jetpes baılyǵy — Prezıdent
ASTANA. KAZINFORM — ıAsaýıdiń taǵlymdy oılary men hıkmetteri túrki halyqtarynyń baǵa jetpes baılyǵy. Bul týraly Túrki memleketteri uıymynyń beıresmı sammıtinde Memleket basshysy Qasym-Jomart Toqaev aıtty.
— Túrkistan — atajurtymyzdyń myzǵymas temirqazyǵy, «eki dúnıe esigi, er túriktiń besigi» atanǵan shejireli shahar. Kóne qala qashanda túbi bir túrki jurtynyń qasıetti qara shańyraǵy sanalǵan. Túrkistan óńirindegi Áziret sultan kesenesi rýhanı tutastyq pen tarıhı sabaqtastyq sımvoly. Qoja Ahmet ıAsaýı baýyrlas elderdiń dúnıetanymyn keńeıtýge zor úles qosty. Adamzatqa ortaq qundylyqtardy barynsha dáriptedi. Halyqty jaqsylyqqa, jasampazdyqqa, adaldyqqa shaqyrdy. Ǵulama oıshyl ıslam dinin túrki jurtynyń tanym-túsinigimen ushtastyra bildi. Asa qundy eńbekter jazyp, mol mura qaldyrdy, — dedi Prezıdent.
Memleket basshysy ıAsaýıdiń taǵlymdy oılary men hıkmetteri túrki halyqtarynyń baǵa jetpes baılyǵy ekenin basa aıtty.
— Uly babamyz dáriptegen qundylyqtar áli de ózektiligin joǵaltqan joq. Sondyqtan biz ıAsaýıdyń gýmanıstik ıdeıalaryna basa mán berip otyrmyz. Qazir elimizde Adal azamat, Ádiletti Qazaqstan, Taza Qazaqstan jáne basqa da biregeı bastamalar tabysty júzege asyrylyp jatyr. Basty maqsatymyz — ult sapasyn barynsha jetildirip, memlekettigimizdi nyǵaıta túsý. Túptep kelgende osy aýqymdy jumystyń negizi ıAsaýı iliminen bastaý alady, — dedi Qasym-Jomart Toqaev.
Aıta keteıik, Prezıdent TMU beıresmı sammıtine qatysý úshin Túrkistan qalasyna barǵan bolatyn.
