ıAsaýı kesenesiniń kúmbezindegi jaǵdaı: mınıstrlik túsinikteme berdi
TÚRKІSTAN. KAZINFORM – Túrkistan qalasyndaǵy Qoja Ahmet ıAsaýı kesenesiniń kúmbezindegi syrtqy qaptamanyń búlingeni týraly aqparat qoǵamda alańdaýshylyq týǵyzdy.
Qazirgi tańda keseneniń negizgi kireberisi temir qorshaýmen qorshalǵan. Osy jaǵdaıǵa baılanysty Kazinform tilshisine Mádenıet jáne aqparat mınıstrligi túsinik berdi.
Vedomstvonyń málimetinshe, kesenede josparly restavratsııalyq jumystar júrgizilip jatyr.
– Sońǵy jyldary qazandyq kúmbezinde 2019-2020 jyldary ornatylǵan glazýrlengen qaptamanyń keıbir bólikterinde búliný jáne ajyraý belgileri baıqaldy. Osyǵan baılanysty Qazrestavratsııa RMK mamandary qaptamanyń tehnıkalyq jaı-kúıine turaqty monıtorıng júrgizip, ǵylymı-restavratsııalyq jumystarǵa daıyndyqty bastaǵan bolatyn, – delingen mınıstrlik habarlamasynda.
Mınıstrliktiń habarlaýynsha, osy jyldyń mamyr aıynda bastalǵan jumystar barysynda glazýrlengen qaptamanyń álsiregen bólikterin kezeń-kezeńimen alý kezinde apattyq jaǵdaıda turǵan fragmentterdi tolyq ajyratý qajettigi anyqtalǵan.
– Sonyń nátıjesinde 27 mamyr kúni Qazrestavratsııa mamandary glazýrlengen plıtkalardyń osal bólikterin aýqymdy demontajdaý jumysyn júrgizdi. Bul – ǵylymı-restavratsııalyq jumystarǵa daıyndyq jáne eń bastysy qaýipsizdikti qamtamasyz etý maqsatynda qabyldanǵan negizdi ári májbúrli shara, – dep atap ótti vedomstvo.
Qazirgi ýaqytta qazandyq kúmbeziniń glazýrlengen qaptamasynyń ózge bólikteriniń jaı-kúıi zerttelip, olardy tolyq alý qajettigin anyqtaýǵa baǵyttalǵan keshendi tekserý jumystary jalǵasyp jatyr.
Sondaı-aq mınıstrlik restavratsııalyq jumystardyń barysy QR Premer-mınıstriniń orynbasary – Mádenıet jáne aqparat mınıstri Aıda Balaevanyń jeke baqylaýynda ekenin málimdedi.
– Bul jaǵdaıǵa turaqty monıtorıng júrgizilip otyr. Qabyldanyp jatqan barlyq sheshim saraptamalyq qorytyndylarǵa, ǵylymı tásilderge jáne mádenı mura nysandaryn saqtaý jónindegi halyqaralyq standarttarǵa negizdeledi. Sondyqtan alańdaýǵa negiz joq. Jumystar josparly, ǵylymı turǵydan negizdelgen jáne eń aldymen Qoja Ahmet ıAsaýı kesenesiniń saqtalýyn qamtamasyz etýge, odan ári zaqymdanýdyń aldyn alýǵa baǵyttalǵan, – dep málim etti mınıstrlik.
Budan buryn habarlaǵanymyzdaı, bıyl 15 aqpannan bastap Qoja Ahmet ıAsaýı kesenesiniń aýmaǵy qorshalyp, kelýshilerdiń kirýi arnaıy ornatylǵan eki týrnıket arqyly júzege asyryla bastady.
Sondaı-aq Qazqaıtajańartý mekemesi úsh jyl boıy keseneni saqtaý jáne qorǵaý baǵytynda keshendi ǵylymı-zertteý jumystaryn júrgizgen bolatyn.
