ıAsaýı kesenesindegi Taıqazan ornalasqan bólme kelýshilerge qashan ashylady
TÚRKІSTAN. KAZINFORM — Qazirgi tańda Qoja Ahmet ıAsaýı kesenesindegi Taıqazan ornalasqan qazandyq bólmesinde jóndeý jumystary júrgizilip jatqandyqtan, kelýshilerge ýaqytsha shekteý qoıylǵan.
Túrkistandaǵy Qoja Ahmet ıAsaýı kesenesinde negizgi bólmelerdiń basym bóligi kelýshiler úshin ashyq. Tek Taıqazan turǵan qazandyq bólmesi ǵana eki jyldan astam ýaqyttan beri jabyq tur.
Osyǵan baılanysty Kazinform tilshisine Qazqaıtajańartý RMK resmı jaýap berdi. Mekeme sońǵy úsh jylda kesenede ǵylymı-zertteý jumystarymen qatar, ǵylymı restavratsııa jumystaryn júrgizip keledi.
Vedomstvo málimetinshe, Taıqazan ornalasqan qazandyq bólmesinde ishki kúmbezdiń stalaktıtterin zertteýge baılanysty kelýshilerdiń kirýine ýaqytsha shekteý engizilgen.
— Buǵan deıin qazandyq bólmesinde ishki kúmbezdiń ahýaly, stalaktıtteri jáne syrtqy kúmbezben baılanysatyn arhıtektýralyq qurylymy jan-jaqty zertteldi. Sonymen qatar kúmbezdiń ishki keńistigindegi myńdaǵan aǵash tirekterdiń jaı-kúıi jeke baǵalanyp, olardyń qurylymdyq turaqtylyqqa áseri saraptaldy. Zertteý nátıjesine sáıkes, ishki jáne syrtqy kúmbezderdi ustap turǵan aǵash tirekterdi nyǵaıtý jáne qaýipsizdigin arttyrýǵa baǵyttalǵan ǵylymı restavratsııa jasalady, — dep málimdedi Qazqaıtajańartý mekemesi.
Qazirgi tańda qazandyq bóliginde ǵylymı restavratsııa júrgizýge arnalǵan alǵashqy ınjenerlik daıyndyq jumystary qolǵa alynǵan.
— Daıyndyq kezeńi aıaqtalǵan soń, ǵylymı restavratsııanyń tıimdi ádis-tásilderi aıqyndalyp, negizgi jumystar bastalady. Ol shamamen úsh jylǵa sozylýy múmkin. Jóndeý jumystary tolyq aıaqtalǵannan keıin Taıqazan bólmesi kelýshilerge qaıta ashylady, — dedi vedomstvo ókilderi.
Jalpy keseneniń qazandyq bóligine júrgiziletin jumystar ıÝNESKO-nyń dúnıejúzilik mádenı jáne tabıǵı murany qorǵaý týraly konventsııasy men onyń nusqaýlyqtaryna sáıkes júzege asyrylady.
Budan buryn habarlaǵanymyzdaı, 15 aqpannan bastap kesene aýmaǵy qorshalyp, kelýshilerdiń kirýi arnaıy ornatylǵan týrnıketter arqyly júzege asyrylatynyn jazǵan edik.
