ıAsaýı kesenesi qart adam sııaqty turaqty kútimdi qajet etedi — mınıstrlik
ASTANA. KAZINFORM — ıAsaýı kesenesi mańyndaǵy jasyl jelekti sýǵarǵannan onyń ylǵaly ǵımaratqa jetken. Bul jaıynda Mádenıet jáne aqparat mınıstrliginen málim etti.
«Qoja Ahmet ıAsaýı kesenesi — qasıetti ári qundy dúnıe. Ejelgi tehnıkamen, tehnologııamen salynǵan. Materıaldary kónergen eskertkish turaqty baqylaýdy talap etedi jáne ony saqtaý, qorǵaý — birinshi kezektegi másele. Sońǵy jyldary keseneniń tóńireginde júrgizilgen belsendi qurylys, abattandyrý jumystary oǵan áserin tıgizbeı qoımady. Máselen, jasyl jelektiń kóbeıip, ony sýǵarý jer qabaty ylǵaldanýynyń artýyna sep bolǵan. Al ol ylǵal kesenege de jetken degen ǵalymdardyń negizdemesi bar», — dep atap ótedi mınıstrlikten agenttiktiń resmı saýalyna oraı.
Vedomstvo málimetinshe, osy jumystyń saldarynan keseneniń qazandyq bólmesindegi álemde analogy joq stalaktıtterdiń jaǵdaıyna baqylaýdy kúsheıtýge týra kelip otyr.
«Keseneniń konstrýktsııalyq, tehnıkalyq jaǵdaıyn 24/7 rejımde baqylap otyrý úshin avtomattandyrylǵan monıtorıng ortalyǵy quryldy. Keseneniń jaǵdaıyn zerdelep, zerttep otyrý maqsatynda elimizdiń ártúrli beıimdegi belgili ǵylymı-zertteý ınstıtýttary tartylady. Sonymen qatar qajettiligine oraı sheteldik mamandardyń da pikirleri tyńdalyp júr. Osy oraıda onyń jaǵdaıyna qatysty barlyq málimetter arnaıy serverge kúni-túni túsip otyrady. Qoja Ahmet ıAsaýı kesenesi qart adam sııaqty turaqty kútimdi, ıaǵnı ǵylymı-restavratsııalyq jumysty qajet etedi jáne ol jumys merziminde qamtamasyz etilýde», — dedi mınıstrlikten.
