ıAroslava Magýchıh álemniń úzdik jeńil atleti atandy

ASTANA. KAZINFORM – Halyqaralyq jeńil atletıka federatsııalary qaýymdastyǵy Olımpıada chempıony ýkraınalyq Magýchıhke álemniń úzdik jeńil atleti ataǵyn berdi. Buǵan deıin ýkraınalyq sportshy 2024 jylǵy Eýropanyń úzdik sportshysy atanǵan bolatyn, dep habarlaıdy DW.

Ýkraınalyq bıiktikke sekirýshi ıAroslava Magýchıh Halyqaralyq jeńil atletıka federatsııalary qaýymdastyǵynyń (World Athletics) nusqasy boıynsha 2024 jylǵy álemniń eń úzdik jeńil atleti atandy. Bul týraly jeksenbi, 1 jeltoqsan kúni keshke federatsııanyń X áleýmettik jelisindegi paraqshasynda habarlandy.

Sońǵy daýys berýde Magýchıh jetisaıys boıynsha 2024 jylǵy Olımpıada chempıony atanǵan belgııalyq Nafıssata Tıamdy basyp ozdy. Ýkraınalyq sportshy Dúnıejúzilik jeńil atletıka júldesine úshinshi jyl qatarynan usynyldy, biraq ol bul júldeni birinshi ret jeńip alyp otyr.

Qazan aıynyń sońynda 23 jastaǵy Magýchıh Eýropanyń 2024 jylǵy úzdik jeńil atleti atanǵan bolatyn. European Athletics júldesin ýkraınalyq sportshyǵa Soltústik Makedonııanyń astanasy Skopede ótken «Golden Tracks» saltanatynda tabys etildi.