Yandex Qazaqstan Kórisý kúnine qatysyp, Otpantaýǵa arnaıy baǵyt ashty
ASTANA. KAZINFORM — Yandex Qazaqstan Mańǵystaý oblysyndaǵy eń bıik núkte — Otpantaý basynda ótken Kórisý kúni (Amal merekesi) aıasyndaǵy dástúrli sharaǵa qatysty.
Kompanııa merekege kelgen qonaqtar úshin arnaıy kıiz úı tikti, sonymen qatar ıAndeks Go servısinde Otpantaýǵa deıingi arnaıy baǵytty iske qosty. Bul merekege qatysýshylardyń saparyn jeńildetý úshin arnaıy uıymdastyryldy.
Kórisý kúni 14 naýryzda atap ótiledi jáne Batys Qazaqstan óńirlerinde Naýryz meıramynyń bastaýy sanalady. Bul kúni adamdar bir-birimen kórisip, qol alysyp, qushaqtasyp, izgi tilekter aıtady. Mereke jańarý, tatýlyq jáne jańa ómir kezeńiniń bastalýyn bildiredi.
Dástúr boıynsha, merekeniń negizgi rásimderiniń biri — Otpantaý shyńynda birlik otyn jaǵý. Bul oryn óńir turǵyndary úshin aıryqsha mánge ıe jáne jyl saıyn merekeni birge atap ótý úshin jınalǵan kópshiliktiń basyn qosady.
— Kórisý kúni — adamdardy jaqyndastyratyn, dástúrdiń qadirin eske salatyn erekshe mereke. Bizge osyndaı mańyzdy sharalarǵa qatysyp, adamı jylýlyqty arttyra túsýge úles qosý mańyzdy. Sonyń biri, árıne, yńǵaıly jol júrý múmkindigin uıymdastyrý, — dedi Yandex Qazaqstan basshysy Tımýr Shalekenov.
Bıyl Yandex Qazaqstan merekege kelgen qonaqtar úshin kıiz úı tigip, qonaqtardy dástúrli taǵamdar — naýryz kóje men baýyrsaqpen qarsy aldy. Sonymen qatar, ıAndeks Taǵam kýrerleri de jınalǵan halyqty aralap, dám usynyp, merekelik kóńil-kúı qalyptastyrýǵa qatysty.
Sondaı-aq, 13-14 naýryz kúnderi ıAndeks Go servısinde «Qalaaralyq» servıs aıasynda Aqtaý — Otpantaý jáne keri baǵytta arnaıy marshrýt iske qosyldy. Otpantaý eldi meken bolyp sanalmaıtyndyqtan, basqa kezde mundaı baǵyt joq. Arnaıy iske qosylǵan marshrýt óńir turǵyndary men qonaqtaryna mereke ótetin jerge yńǵaıly jetip, keri qaıtýǵa múmkindik berdi.