«ıAndeks.Taksı» júrgizýshilerine arnalǵan pılottyq joba iske qosyldy

ASTANA. KAZINFORM — Astana men Almaty qalasynda "ıAndeks.Taksı" mobıldi qosymshasy arqyly klıentterdi jetkizetin júrgizýshilerge arnalǵan jańa joba qolǵa alyndy. Bul týraly Qarjy vıtse-mınıstri Erjan Birjanov málim etti.

«Memlekettik kirister komıteti ıAndeks taksı qyzmetimen birlesip Astana jáne Almaty qalasynda taksı júrgizýshilerine arnalǵan pılottyq jobany iske qosty. Jobaǵa 4 400-den astam taksı júrgizýshisi qatysyp jatyr. Osy jyldyń qańtar aıynda 2 800-den astam taksıst qosyldy», — dedi Erjan Birjanov Ortalyq kommýnıkatsııalar qyzmeti alańynda ótken baspasóz máslıhatynda.

Onyń aıtýynsha, pılottyq joba jyl sońyna deıin júzege asyrylady.

Sondaı-aq, brıfıng barysynda aldaǵy ýaqytta Glovo, Wolt, InDrive taǵy sol sııaqty klıentterge qyzmet kórsetetin kompanııalardy pılottyq jobaǵa qatystyrý jospary týraly aıtyldy.

Odan bólek, taksı júrgizýshileri úshin pılottyq jobanyń artyq tustary túsindirildi:
— taksoparkterdiń deldaldyq qyzmetterin alyp tastaý, bul aqsha qarajatyn únemdeýge jáne olardy salyqtar men áleýmettik tólemderdi tóleýge baǵyttaýǵa múmkindik beredi. Tıisinshe, júrgizýshi áleýmettik qamsyzdandyrý júıesine tartylady;
— jeke kásipker retinde tirkeýdi ońaılatý (memlekettik kirister organdaryna barmaı);
— naqty alynǵan kiristiń 1% mólsherinde salyq tóleý (al qyzmetkerdiń kirisinen salyq 10% mólsherinde ustalady);
— salyq eseptiligin usyný boıynsha mindettemelerdiń bolmaýy.