«ıAndeks taksı» qyzmetin synaǵan depýtat otandyq júıeni qoldaýǵa shaqyrdy
QYZYLORDA. KAZINFORM — Qyzylorda oblysyna jumys sapary kezinde Parlament Májilisiniń depýtattary, «Amanat» partııasy fraktsııasynyń músheleri qaıta jańǵyrtylyp jatqan «Qyzylorda avtobýs parki» JShS-ne qarasty jańa avtovokzalǵa bardy.
«Taza Qazaqstan» jalpyulttyq ekologııalyq baǵdarlamasy aıasynda iske qosylǵan «Eko taksı» qyzmetiniń jumysymen tanysty. Májilis depýtaty Murat Ábenov jobanyń mańyzdylyǵyna toqtalyp, otandyq «Aparu» júıesine negizdelgen taksı qyzmetin ózge óńirlerge de engizýdi usyndy. Aıtýynsha, bul júıe júrgizýshilerdiń áleýmettik qorǵalýyn qamtamasyz etip, tabystyń el ishinde qalýyna múmkindik beredi.
— Qazir Parlamentte «ıAndeks taksı» qyzmetin kóterip jatyrmyz. Bul baǵytta kóp syn aıtylady. Bul taksı qyzmetiniń paıyzy óte joǵary — 25 paıyzǵa deıin. Júrgizýshilerdiń densaýlyǵyn teksermeıdi, aılyq jalaqysyn bermeıdi. Zeınetaqy jarnasyn, áleýmettik tólemder tólemeıdi. Saqtandyrylmaǵan. Baqylaý joq. Budan túsken qarjynyń barlyǵy shet elge ketip jatyr. Bul — úlken problema. Qyzylordada qolǵa alynyp otyrǵan taksı qyzmeti qazaqstandyq «Aparu» júıesine qosylǵan eken. Ár júrgizýshi bir reıs úshin 60 teńge tóleıdi. Tapsyrystan túsken qalǵan qarjy júrgizýshige túsedi, ıaǵnı úılestirýshi mekemeler arqyly júrgizýshiniń jalaqysy, áleýmettik tólemderi tolyq aýdarylady. Sonymen birge árbir júrgizýshi kúndelikti medıtsınalyq baqylaýdan ótedi. Bul azamattardyń qaýipsizdigi úshin óte mańyzdy, — dedi Murat Ábenov.
Depýtat jobany basqa óńirlerge de engizýge, otandyq júıeni qoldaýǵa shaqyrdy. Onyń sózinshe, sol kezde túsken qarjy shet elge emes, elimizdiń bıýdjetine túsedi.
Atap óteıik, 2024 jyldyń 30 qyrkúıeginde qyzmetin bastaǵan «Eko taksı» qyzmetine jolaýshylar «Juldyz taksı», «Aparu» jáne «ıAndeks taksı» qosymshalary arqyly tapsyrys bere alady.
Eske salaıyq, Qazaqstanda taksı salasynda 500 myńnan astam adam eńbek etedi. Májilis depýtaty Elnur Beısenbaev buǵan deıin depýtattyq saýalynda taksı naryǵy áli kúnge deıin jetkilikti deńgeıde rettelmeı otyrǵanyn aıtqan bolatyn.