ıAndeks taksı baǵany negizsiz kóterip otyrady - Astana taxi servise
ASTANA. QazAqparat - Astanadaǵy taksoparkter óz tapsyrystaryn der kezinde oryndaı almaıdy. Sebebi kólik júrgizýshileri ıAndeks taksı sııaqty qyzmetterdiń qymbat tarıfterimen jyldam paıda taýyp, sonymen taksoparktiń kúndelikti jarnalaryn jaýyp tastaýǵa tyrysady, dep habarlaıdy QazAqparat tilshisi.
«Astana taxi servise» JShS bas dırektory Oleg Fatıýhınniń aıtýynsha, búginde taksoparkterde resmı túrde jumys isteıtin kólik júrgizýshileri az emes, tapsyrystar da barshylyq. Alaıda kólik júrgizýshileri óz tapsyrystaryn kóp ala bermeıdi. Sebebi ıAndeks taksıdiń tapsyrysyn ala salǵan tıimdi.
«Máselen, biz 500 teńgege aparatyn jerge ıAndeks taksı 1200-ge barady. Árıne, ondaı tarıfti kórgen kólik júrgizýshisi birden óz tapsyrystaryn ysyryp qoıyp, atalǵan qyzmetke qosylady. Ol jaqta eshkimdi teksermeıdi. Qońyraý shalsa, jetkilikti. Kólik júrgizýshisin tirkeı salady», - dedi O.Fatıýhın Astana qalasy boıynsha kásipkerlerdiń quqyqtaryn qorǵaý jáne sybaılas jemqorlyqqa qarsy is-qımyl jónindegi keńestiń búgingi otyrysynda.
Onyń sózine qaraǵanda, taksoparktiń tapsyrysynan bas tartqan kólik júrgizýshilerin ustaý qıyn. Olar myń bir syltaý tabady. «Dóńgelegim jarylyp qaldy», - deıdi de, ıAndeks taksıdiń tapsyrysyn alyp kete beredi. Búginde Astanada resmı taksoparkter naryqtyń az ǵana mólsherin alyp otyr. Qalǵany kóleńkeli bızneske aınalyp ketti.
«ıAndeks taksı bir jerge kirse, birden monopolııany ornatady. Máselen, Máskeý nemese Sankt-Peterbýrgke kirdi de, búkil naryqty basyp aldy. Bul jerde bir máseleni eskerý kerek, olar qosymsha aqy tóleıdi. Ony ınvestorlar men bırjadan túsken qarjymen ótep otyrady. Aldymen naryqqa kirip alady, odan keıin baǵany negizsiz kóterýge kirisedi. Qazir Astanada týra sondaı jaǵdaı bolyp otyr. Olar keldi de, arzan tarıf qoıdy. Klıentterdi jınap aldy. Biraq kólik júrgizýshilerine qosymsha aqyny óz qaltasynan, jańaǵy ınvestorlar men bırjadan túsken aqshadan tólep otyrady. Al resmı taksoparkter olaı isteı almaıdy. Sóıtip, naryqty basyp alǵannan keıin baǵany kóterip tastaıdy. Qazirdiń ózinde sezilip otyr. Qarbalas ýaqytta ıAndeks taksı sumdyq qymbat alady. Kólik júrgizýshilerin eshkim baqylamaıdy, qaýipsizdikti baqylaıtyn eshkim joq», - dep atap kórsetti O.Fatıýhın.
