ıAndeks nege Ózbekstanda 13%, Qazaqstanda 20%-ǵa deıin alym jınaıdy
ASTANA. KAZINFORM – Básekelestikti qorǵaý jáne damytý agenttigi tóraǵasynyń orynbasary Bolat Sámbetov «ıAndekstiń» Qazaqstandaǵy baǵa saıasatyna algorıtmdik aýdıt júrgizip jatqandaryn málim etti.
- Biz baǵa máselesiniń algorıtmine aýdıt júrgizip aıaqtadyq. Sonyń qorytyndysy boıynsha belgili bir sharalar qabyldaımyz. Sońǵy ret Májiliske kelgenimizde «ıAndekstiń» shekti baǵalaryn belgileý týraly da usynystar aıtylǵanyn bilesizder. Qazir olar ár sapardyń qunynan 16 paıyz kóleminde alym jınaıdy. Oǵan taksı parkteriniń 4 paıyzyn qosamyz. Sonda Astana men Almatyda taksı qyzmetiniń 20 paıyzyn ıAndeks alyp otyr. Basqa qalalarda, árıne, sál tómen. Biz bul máselede halyqaralyq tájirıbeni negizge alamyz. Keıbir elder alym 30 paıyzǵa deıin barady. Mysaly, Ózbekstanda 13 paıyz bolsa, Qazaqstanda 20 paıyzǵa deıin. Qazir osy máseleni talqylap jatyrmyz, - dedi ol Májilis depýtattarynyń suraǵyna bergen jaýapta.
Onyń aıtýynsha, «ıAndeks» Almaty men Astanada ǵana monopolıst bolyp otyrǵan joq.
- Biraq bul qalalarda naryqtyń 90 paıyzyna jýyǵyn baqylap otyr. Kompanııa óz monopolııasyn jyldan-jylǵa arttyryp keledi. Biz «ıAndekstiń» áreketine turaqty monıtorıng júrgizip otyrmyz. 2024 jyldyń ishinde baǵa máselesiniń algorıtmine aýdıt júrgizý úshin sheteldik sarapshylardy tarttyq. Óıtkeni «ıAndekstiń» baǵasy algorıtmderge negizdelgen – aýa raıyna baılanysty nemese basqa da sebeptermen suranys artsa, baǵa da avtomatty túrde ósip otyrady. Kompanııa ókilderimen únemi kezdesip otyramyz. Bul naryqtyń óz erekshelikteri bar. Klassıkalyq úlgiden ózgesheleý. Klassıkalyq naryqta monopolıst pen tutynýshy ǵana áreket etedi. Al «ıAndekstiń» jaǵdaıynda kompanııa men tutynýshylardyń ortasynda 300 myńdaı kólik júrgizýshisi men olardyń otbasy bar. Bul shamamen 1,5 mln adam degen sóz, - dedi Bolat Sámbetov.
Aıta keteıik, Májiliste monopolııaǵa qarsy ujymdyq shaǵym tetigin iske qosýǵa baǵyttalǵan zań jobasy tanystyryldy.