«ıAndeks» Qostanaı oblysynyń agroónerkásiptik keshenin tsıfrlandyrýmen aınalysady

QOSTANAI. QazAqparat -Qostanaı oblysynyń basshylyǵy "ıAndeks" kompanııasymen agroónerkásiptik keshendi tsıfrlandyrý boıynsha kelisimderge qol qoıdy, dep habarlaıdy QazAqparat tilshisi oblys ákimdiginiń baspasóz qyzmetine silteme jasap.

Kelisim Qostanaı oblysy ákiminiń orynbasary Meıirjan Myrzalıevtiń Máskeýge jumys sapary barysynda jasaldy.

M.Myrzalıev ekonomıkalyq sektordy tsıfrlandyrý máselelerin talqylaý úshin «ıAndeks» kompanııasynyń vıtse-prezıdenti Marına Amelınamen kezdesti. Nátıjesinde taraptar agroónerkásiptik keshendi tsıfrlandyrý boıynsha kelisimderge qol qoıdy. Ekijaqty qujatqa sáıkes, «ıAndeks» kompanııasynyń  ázirlegen jobalary Arqalyqtaǵy «aqyldy» qala júıesine engiziletin bolady. Bul qalada balamaly qýat kózin endirýdiń alǵashqy tájirıbeleri iske asyrylatynyn buǵan deıin habarlaǵan bolatynbyz.

Aımaq basshysynyń orynbasary issapar barysynda sondaı-aq Eýrazııalyq ekonomıkalyq komıssııanyń (EEK) «Eýrazııalyq ekonomıkalyq odaqtaǵy organıkalyq aýyl sharýashylyǵyn damytý» atty semınaryna qatysty. Sharaǵa EEK-tiń múddeli músheleri, halyqaralyq uıymdar men memlekettik organdar, ǵylymı mekemeler men bıznes qurylymdar qatysty. Jıynda aýyl sharýashylyǵyn normatıvtik-quqyqtyq jaǵynan qamtamasyz etýdiń álemdik tájirıbesin zerdeleý men ony damytýdyń joldary qaraldy.

«Atalǵan kezdesý Qazaqstan-Reseı arasyndaǵy ekonomıkalyq áriptestikti nyǵaıtý jáne ınvestorlardy tartý maqsatymen ótkizildi. Qazaqstanda búgingi kúni 30-dan astam organıkalyq (un, jarma, ósimdik maıy, kámpıt) ónim óndirýshi zaýyt bar. Solardyń deni Qostanaı oblysynda ornalasqan. Semınar aıasynda Eýrazııalyq ekonomıkalyq komıssııaǵa múshe elder ónerkásipti birizdendirý jáne damytý satysyndaǵy máselelerdi talqyǵa saldy», - dedi Myrzalıev.
 

Qazaqstan Respýblıkasynyń saýda ókildigi sonymen qatar Eýropalyq odaq elderiniń ınvestorlar tobymen jáne Blue Coral ICS kompanııasymen kezdesti.