ıAna Legkodımova isi: Prokýror eki kúdiktini ómir boıyna sottaýdy surady

ATYRAÝ. KAZINFORM — Búgin qylmystyq ister jónindegi sotta kámeletke tolmaǵan jábirlenýshige qatysty asa aýyr qylmys jasaǵany úshin aıyptalǵan Qaıyrjanov pen Katımovke qatysty is boıynsha jaryssóz ótti.

Memlekettik aıyptaýshynyń aıtýynsha, sot tergeýi barysynda jınaqtalǵan aıǵaqtar, sonyń ishinde kýágerlerdiń jaýaptary, beınejazbalar, saraptamalyq qorytyndylar jáne basqa da dálelder aıyptalýshylardyń kinásin tolyqtaı dáleldeıdi.

— Sot otyrysynda aıyptalýshylar óz kinásin tek aıǵaqtardyń dáıekti túrde usynylǵanynan keıin ǵana ishinara moıyndady. Tergeý kezinde alynǵan hat almasýlarda olardyń jábirlenýshini óltirýdiń túrli tásilderin talqylaǵany anyqtaldy. Olar 20-ǵa jýyq tásildi usynǵan, sonyń ishinde ýlaý, tunshyqtyrý, soqqy jasaý, órt qoıý jáne ózge de qatygez áreketter bar, — dedi prokýror.

Aıyptaýshynyń sózinshe, aıyptalýshylar qylmys jasaǵannan keıin eshqandaı ókinish sezinbegen, kerisinshe kóńil kóterý oryndaryna baryp, alkogol ishken. Bul olardyń áreketine tán qatygezdik pen adam ómirine degen nemquraılyqty kórsetedi.

Sot-psıhıatrııalyq saraptama qorytyndysyna sáıkes, aıyptalýshylar qylmys jasaǵan sátte aqyl-esi durys bolǵan, óz áreketteriniń qoǵamǵa qaýiptiligin tolyq túsingen. Sondaı-aq medıtsınalyq saraptama olardyń esirtki nemese alkogol áserinde bolmaǵanyn anyqtaǵan.

— Іstiń mán-jaıyn, aıyptalýshylardyń áreketteriniń joǵary qoǵamdyq qaýiptiligin jáne asa aýyr sanattaǵy qylmys jasaǵanyn eskere otyryp, olardyń qoǵamnan oqshaýlanýyn qajet dep sanaımyn. Osyǵan baılanysty Qaıyrjanov pen Katımovke QR Qylmystyq kodeksiniń 99-baby 2-bóliginiń 7 jáne 8-tarmaqtary boıynsha ómir boıyna bas bostandyǵynan aıyrý jazasyn taǵaıyndaýdy suraımyn, — dedi memlekettik aıyptaýshy.

Sonymen qatar prokýror sot shyǵyndaryn jáne jábirlenýshi taraptyń ótemaqysyn sottalýshylardyń ózderinen óndirip alýdy surady.

Prokýrordyń usynysy boıynsha, Qaıyrjanov pen Katımov memleket kirisine 816 623 teńge kólemindegi sot saraptamalarynyń shyǵyndaryn, sondaı-aq Qorǵaý jáne jábirlenýshilerge ótemaqy tóleý qoryna árqaısysy 37 AEK kóleminde mindetti tólem tóleýge tıis.

Buǵan deıin ıAna Legkodımovany óltirdi dep aıyptalǵandardyń jazasy qatańdaǵanyn jazǵanbyz.