ıAna Legkodımovany óltirýdiń 20-dan astam ádisin oılastyrǵan: kinálilerdiń úkimi ózgerissiz qaldy
ATYRAÝ. KAZINFORM. — Atyraý oblystyq sotynyń qylmystyq ister jónindegi sot alqasy ıAna Legkodımovany óltirgender Rızýan Qaıyrjanov pen Altynbek Katımovtyń apellıatsııalyq shaǵymyn qarap, úkimdi ózgerissiz qaldyrdy.
Sotta Rızýan Qaıyrjanovtyń advokaty men ákesi sottalýshynyń ómir boıyna bas bostandyǵynan aıyrý jazasyn shekti merzimge aýystyrýdy surady. Rızýan Qaıyrjanovtyń advokatynyń sózinshe, aıyptalýshy ıAna Legkodımovanyń nómirin birneshe ret buǵattap tastaǵan. ıAna Legkodımovanyń tarapynan habarlama arqyly Qaıyrjanovqa qysym kórsetilgen deıdi qorǵaýshy. Al ákesi jazany jeńildetýdi surap, eldiń basqa óńirinde bolǵan qylmystyq isterge berilgen jazalarǵa mysal keltirdi.
— Eger Rızýan sonshalyqty qatygez qylmysker bolsa, múrdeni jasyrǵan jerin aıtar ma edi?! Sondaı-aq aldyn ala daıyndaldy degen tujyrymǵa qaıta baǵa berýdi suraımyn. Qylmystyq oqıǵa nátıjesi eki aıyptalýshynyń jazǵan habarlamalarymen tolyq sáıkes kelmeıdi. Olardyń jazbalarynda múrdeni jasyrý orny, ıaǵnı Taldykól aýyly týraly birde bir sóz joq. Sóılesý barysynda naqty josparǵa toqtalmaǵan.Tek nusqalaryn pysyqtaýmen shektelgen. Budan bólek jábirlenýshi óz erkimen páterge barǵan. Jábirlenýshi óz erkimen úıine qaıta kelgen. Qolynda telefony bolǵan, ıaǵnı kómekke shaqyrý múmkindigi bolǵan. Ekeýi jábirlenýshini óltirýdi aldyn ala josparlap júrgen bolsa, qylmystyq pıǵyldaryn adam kózinen tys jerde, ıaǵnı páterde tolyqtaı iske asyrýǵa múmkindikteri boldy. Biraq is materıaldarynan jáne Rızýannyń jaýabyna sáıkes onyń oıy men áreketi kólik ishinen keıingi janjaldan paıda bolǵan, — dedi Rızýan Qaıyrjanovtyń ákesi.
Al Altynbek Katımovtyń advokaty men ákesi is materıaldarynda aqsha tólengenin dáleldeıtin naqty aıǵaq joq dep eseptep, qorǵaýyndaǵy adamǵa «kisi óltirýdi jaldaý» aıybyn taǵý negizsiz dep pikir bildirdi.
Otyrysta sóz alǵan jábirlenýshi taraptyń advokaty Samat Áýovtyń aıtýynsha, 2024 jyldyń 8 qazanynan bastap Katımovtyń Atyraý qalasyna kelýine deıingi hat almasýlarda qylmysty júzege asyrýdyń túrli tásili ashyq talqylanǵan. Mysaly, podezde balǵamen soǵý, óltirip, kómip tastaý sekildi 20 nusqany sóz etken.
Jábirlenýshi taraptyń advokaty Samat Abýov Rızýan Qaıyrjanov pen Altynbek Katımovtyń bir-birine jazǵan habarlamalaryn oqydy. Rızýan Qaıyrjanov Altynbek Katımovtan adam óltirý úshin qansha teńge surar ediń degen saýal qoıady.
— Rızýan: Eger men saǵan 500 myń teńge tólesem…
— Altynbek: Maǵan aýdı satyp alyp berseń, 2 metrge kómip tastaımyn.
Advokat ıAnany izdeý sharalaryna da nazar aýdardy. Resmı málimet boıynsha, qazan aıynan bastap izdeý jumystaryna Qazaqstan Tótenshe jaǵdaılar mınıstrligi bólimsheleri, polıtsııa, eriktiler, súńgýirler men arnaıy tehnıka tartylǵan. Alaıda marqumnyń denesin 8 aıdan keıin, 20 maýsym kúni Jaıyq ózeniniń jaǵasyna demalýǵa shyqqan azamattar tapty. Olardyń súıek bólikteri Jaıyqtan 15–20 metr jerde ashyq aýmaqta jatqan. Sondaı-aq, tabylǵan oryn ózenge tastalǵan núkteden shamamen alty shaqyrym tómen ornalasqany aıtyldy. Súıekterdiń uzaq ýaqyttan keıin sý baspaıtyn aýmaqqa qalaı shyqqanyna qatysty suraqtar bar.
— Qylmys 19 qazan kúni bolǵan. Olardy 21 qazan kúni qamady. Arada úsh kún ótip ketti. Ekeýi ıAnany ózenge laqtyryp jibergennen keıin úsh kún ishinde múmkin olarǵa bireý kómektesip, deneni alyp shyǵyp, basqa jerge aparýy yqtımal. Danııar Erdeshov degen kýáger boldy. Ol Rızýan Qaıyrjanovtyń jezdesi. Ol sol ýaqytta ákimdikte jumys istedi, buryn tergeýshi bolǵan. ıAna joǵalǵan boıda men qyzymnyń kúndeligi arqyly Rızýan Qaıyrjanov týraly bilip, barlyq mán jaıdy polıtsııa qyzmetkerlerine aıttym. Rızýan óziniń jezdesi Danııar Erdeshovpen polıtsııaǵa kelgen. Keıin olardy bosatyp jibergen. Men muny múlde túsinbedim? Rızýan Qaıyrjanovty tym bolmasa 24 saǵat ustamady?!, — dedi marqumnyń anasy Galına Legkodımova.
Galına Legkodımova sottalǵandardyń ákelerine úndeý jasap, olardyń balalarymen kezdesýge bar múmkindikteriniń ózinde joq ekenin aıtty.
— Olar meniń jalǵyz balam baryn bildi. Eshteńe toqtata almady. Qyzymdy óltirdi, onymen birge meni de óltirdi. Sol kúnnen beri men ómir súrip jatqan joqpyn, tek barmyn. Biz densaýlyǵymyzdan, júıkemizden aıyryldyq. Bir jyl tórt aı ótse de, biz úshin bul bir kúndeı ǵana. Týǵan kúnderdi, merekelerdi toılamaımyz, — dedi ol.
Atyraý oblystyq sotynyń qylmystyq ister jónindegi sot alqasynyń tóraǵasy Tátti Ýalıeva sottalǵan Katımovtyń jábirlenýshi Legkodımovanyń telefonyn joıýǵa qatysy joq ekeni týraly apellıatsııalyq shaǵymdaǵy ýáji negizsiz dep tanylǵanyn málimdedi. Sebebi sotta zerttelgen jedel-izdestirý sharalary nátıjesinde alynǵan abonentter arasyndaǵy baılanystar týraly málimet Katımovtyń qylmys jasalǵan sátte de, qylmystan keıin telefon joıylǵan kezde de Qaıyrjanovpen birge bolǵanyn rastady. Bul olardyń áreketteriniń kelisilgenin dáleldegen.
— Sottalǵandardyń qylmystyń jaldaý arqyly jasalǵany jóninde dálelder joq degen ýájderi de sot otyrysynda zerttelgen hat almasýlarmen teriske shyǵaryldy. Atalǵan jazbalar sottalǵandar arasynda 500 myń teńgege kisi óltirý týraly áńgime bolǵanyn kórsetetin obektıvti dáleldeme retinde esepteledi, —dedi Atyraý oblystyq sotynyń qylmystyq ister jónindegi sot alqasynyń tóraǵasy Tátti Ýalıeva.
Sot alqasy sottalǵandardyń qylmysqa muqııat daıyndalǵany, kisi óltirýdiń 20-dan astam tásilin oılastyrǵany anyq kórinetinin aıtty. Sonymen qatar, kisi óltirýge eleýli sebep nemese naqty ýáj bolmaǵany baıqalady. Jábirlenýshi tarap ta qylmysqa túrtki bolǵan naqty motıvtiń bolmaǵanyn atap ótti.
— Sottalǵandardyń qylmystan keıingi áreketteri — bolǵan oqıǵany meıramhanada syra iship talqylap, uzaq ýaqyt birge otyrýy — qylmystyń salqynqandy ári tsınıkalyq túrde jasalǵanyn ańǵartady. Atalǵan mán-jaılar bul qylmystyń jáne sottalǵandardyń qoǵamǵa qaýiptilik dárejesiniń joǵary ekenin kórsetedi. Osyǵan baılanysty jaza da ózgerissiz qaldyryldy, — dedi sóz sońynda Atyraý oblystyq sotynyń qylmystyq ister jónindegi sot alqasynyń tóraǵasy Tátti Ýalıeva.
Eske salaıyq, 2024 jyldyń qazan aıynyń 18-i kúni ıAna Legkodımova úıinen shyǵyp ketip, oralmady.
8 aıdan keıin onyń denesi Jaıyq ózeniniń Taldykól aýylynyń tusyndaǵy jaǵasynan tabyldy. Onyń denesin sol aýmaqqa demalysqa barǵan otbasy taýyp alǵan edi.
Protses kezinde Qaıyrjanov pen Katımovtyń, marqum men Qaıyrjanovtyń arasyndaǵy habarlamalar oqyldy. Tergeý materıalyna súıensek, Qaıyrjanov ıAnany kóliktiń ishinde qylqyndyryp óltirgen. Al Katımov mashınanyń syrtynan esikti jaýyp, ıAnanyń shyǵýyna múmkindik bermegen. Óltirgennen keıin Face ID arqyly ıAnanyń telefonyn ashyp, habarlamalardy ketirip, keıin denesin Jaıyqqa laqtyryp jibergen. Іske tórelik etken sýdıa sol kezde ıAnany aıyptalýshylar paıdakúnemdik nıetpen óltirgenin aıtqan edi.
Osyǵan deıin aıyptalýshylardyń sot kezinde aıtqan sózderi men jábirlenýshi taraptyń advokaty Ajar Abdıl bul qylmys kezdeısoq janjal emes, júıeli sıpattaǵy áreket ekenin aıtqany týraly jazǵan edik.
Sonymen qatar, bul isti tergegen Temirhan Qajmuratovpen suhbattasyp, istiń mán-jaıyn habardar ettik.
2025 jyldyń 17 qarashasynda ıAna Legkodımovanyń ólimine qatysty qylmystyq iske núkte qoıylyp, sot sheshimimen Qaıyrjanov pen Katımov QR Qylmystyq kodeksiniń 99-baby 2-bóliginiń 7 jáne 8-tarmaqtarynda kózdelgen asa aýyr qylmys jasaǵany úshin kináli dep tanylyp, ómir boıyna bas bostandyǵynan aıyryldy.