Yahoo kompanııasynan 1 mlrd qoldanýshynyń málimeti urlandy
ASTANA. QazAqparat - Amerıkalyq Yahoo ınternet kompanııasynan 1 mıllıard qoldanýshynyń jeke málimeti urlanǵan kórinedi, dep jazady «Habar 24».
Kompanııa ókilderiniń aıtýynsha, hakerler shabýyly 2013 jyly jasalǵan. Belgisiz kıber qaraqshylar Yahoo qoldanýshylarynyń aty-jóni men týǵan kúni, telefon nómiri, elektrondy paraqshalary men kilt sózderin urlaǵan. Degenmen nesıe kartalary men bank esepshottary qaraqshylardyń qolyna túspegen.
Qyrkúıek aıynda dál osy kompanııa 2014 jyly hakerler shabýylynan 500 mıllıon adamnyń akkaýnty urlandy dep málimdegen bolatyn. Ol kezde Yahoo qaraqshylyq árekettiń artynda bútin bir eldiń úkimeti turǵanyn aıtqan edi. Alaıda qaı memleket ekenin atap aıtpady. Al mamandar bul eki shabýyldyń bir-birine qatysy joq dep otyr.
