Yahoo-ge kıber shabýyl jasaǵan qazaqstandyq kinásin moıyndady
ASTANA. QazAqparat - AQSh-taǵy Yahoo kompanııasynyń jelilerine kıber shabýyl jasady dep aıyptalǵan Qazaqstannan shyqqan 22 jastaǵy Kanada azamaty Karım Baratov óz kinásin moıyndady, dep habarlaıdy «QazAqparat» HAA tilshisi AQSh-tyń Ádilet mınıstrliginiń saıtyna silteme jasap.
Vedomstvo málimetinshe, Baratov pen basqa da úsh aıyptalýshy, (ekeýi - RF FQQ qyzmetkerleri) Yahoo serverlerine shabýyl jasaǵany jáne tutynýshylar málimetterine zańsyz qol suqqany úshin aıyptalyp otyr.
Amerıkalyq mınıstrliktiń habarlaýynsha, Baratov túsinik berý kezinde FQQ qyzmetkerleriniń tapsyrysymen hakerlik qyzmetterdi júzege asyrǵanyn, 2010-2017 jyldar aralyǵyndaǵy tutynýshylardyń 11000-nan astam eseptik jazbalaryn buzǵanyn moıyndady.
Baratov árqaısysynda 10 jylǵa deıingi merzimmen bas bostandyǵynan aıyrý jazasyn kózdeıtin aıyptaýdyń 8 tarmaǵy boıynsha kinásin moıyndady. Kinásin moıyndaý týraly kelisim aıasynda jazasyn óteý merzimine qosa Baratov óz qurbandarynyń shyǵynyn ótep berýge, sonymen qatar, qalǵan qarajattan 2 250 000 AQSh dollaryna deıin jetýi múmkin aıyppul tóleýge kelisim berdi.
Burynǵy qazaqstandyqqa qatysty sot úkimi 2018 jyldyń 20 aqpany kúni atalǵan is boıynsha ótetin San-Frantsısko qalasyndaǵy sottyń kelesi otyrysynda habarlanatyn bolady.
Sondaı-aq, Baratov Kanadaǵa ekstradıtsııalaýdan bas tartyp, qazirgi ýaqytta Kalıfornııa shtatynda qamaýǵa alyndy.
