ıAdrolyq fızıka ınstıtýtynda ǵalymdarǵa arnalǵan zamanaýı jataqhana paıdalanýǵa berildi
ASTANA.KAZINFORM - ıAdrolyq fızıka ınstıtýtynda 166 qyzmetker men mamanǵa arnalǵan jańa jeti qabatty jataqhana paıdalanýǵa berildi. Bul – Táýelsizdik jyldarynda ǵylymı-zertteý uıymy úshin arnaıy salynǵan biregeı turǵyn úı nysany.
QR Atom energııasy jónindegi agenttiktiń baspasóz qyzmetiniń habarlaýynsha, saltanatty ashylý rásimine Qazaqstan Respýblıkasynyń Atom energııasy jónindegi agenttiginiń tóraǵasy Almasadam Sátqalıev jáne ıAdrolyq fızıka ınstıtýtynyń bas dırektory Saıabek Sahıev qatysty.
Ǵımarattyń jalpy aýmaǵy 5082 sharshy metr. Joba jas ǵalymdar men mamandarǵa qolaıly turmys jaǵdaıyn jasaýǵa, kadrlyq áleýetti nyǵaıtýǵa jáne Qazaqstannyń ıadrolyq klasterin qalyptastyrý aıasynda ǵylymı bastamalardy damytýǵa baǵyttalǵan.
Jataqhana zamanaýı talaptarǵa saı salynǵan jáne turǵyndardyń jaıly ómir súrýine qajetti barlyq jaǵdaımen qamtamasyz etilgen. Jartylaı jertóle qabatynda jattyǵý zaly, kir jýý bólmesi jáne qyzmettik úı-jaılar ornalasqan. Birinshi qabatta keń vestıbıýl men qabyldaý aımaǵy, kovorkıng keńistigi, arnaıy kelissózder zaly jáne 50 orynǵa arnalǵan ashana qarastyrylǵan. Árbir turǵyn bólme dýsh kabınasy bar jeke sanıtarlyq torappen jabdyqtalǵan, bul turmystyq qolaılylyq pen jeke keńistiktiń joǵary deńgeıin qamtamasyz etedi.
Ǵımaratty jobalaý barysynda erekshe qajettilikteri bar adamdar úshin qoljetimdi orta talaptary da eskerilgen.
Agenttik tóraǵasy zamanaýı áleýmettik ınfraqurylymdy qalyptastyrý ǵylymdy damytýdyń strategııalyq ınvestıtsııasy ekenin atap ótti.
- Qolaıly áleýmettik orta – myqty ǵylymı mekteptiń negizi. Osyndaı jaǵdaıda turaqty ujymdar qalyptasady, talantty jastar tartylady jáne otandyq atom salasynyń bolashaǵyn aıqyndaıtyn aýqymdy jobalar júzege asyrylady, - dedi Almasadam Sátqalıev.
Instıtýttyń bas dırektory Saıabek Sahıev jataqhananyń paıdalanýǵa berilýi ınfraqurylymdy jańǵyrtý jáne ıadrolyq medıtsına, radıatsııalyq tehnologııalar men irgeli zertteýler baǵyttaryn damytý jónindegi júıeli jumystyń mańyzdy kezeńi ekenin atap ótti.
Jańa jataqhananyń paıdalanýǵa berilýi Instıtýttyń áleýmettik ınfraqurylymyn damytýdaǵy mańyzdy qadam boldy. Joba jas ǵalymdar men mamandar úshin ornyqty kásibı orta qalyptastyryp, kadrlyq áleýetti nyǵaıtýǵa jáne Qazaqstannyń atom salasynyń strategııalyq mindetterin iske asyrýǵa baǵyttalǵan zamanaýı ǵylymı ekojúıeni qalyptastyrýǵa serpin beredi.
Osyǵan deıin Almatyda 482 oryndyq jańa stýdenttik jataqhana ashylǵany týraly jazdyq.