«Y.Altynsarın-2015» respýblıkalyq pándik olımpıadasy ótip jatyr
ASTANA. QazAqparat - Qazaq memlekettik qyzdar pedagogıkalyq ýnıversıtetiniń uıymdastyrýymen elimizdiń jeti oblysynda respýblıkalyq «Y.Altynsarın - 2015» pándik olımpıadasy ótip jatyr. Bıyl olımpıadaǵa qatysýǵa 4000-nan asa mektep bitirýshi oqýshy nıet bildirgen, dep habarlady atalǵan bilim ordasynyń baspasóz qyzmetinen.
Jeti oblys boıynsha ótip jatqan bilim synaǵy birdeı ýaqytta saǵat 12.00-de bastaldy. Olımpıada atap aıtqanda, Almaty qalasynda; Almaty oblysynyń Taldyqorǵan, Jarkent qalasy men Raıymbek aýdanynyń Kegen aýylynda; Jambyl oblysyna qarasty Taraz qalasy men Qordaı aýdanynda; Ońtústik Qazaqstan oblysynyń Shymkent jáne Túrkistan qalasynda; Qyzylorda oblysynyń Qazaly, Jańaqorǵan, Qarmaqshy aýdandarynda, Qyzylorda qalasynda; sonymen qatar, Shyǵys Qazaqstan oblysynyń Semeı jáne Óskemen qalasynda jáne Qaraǵandy oblysy boıynsha Qaraǵandy qalasynda; sondaı-aq, Batys Qazaqstan oblysynyń Oral men Atyraý qalasynda ótip jatyr. Bilim saıysyna tek qana qyz balalar qatysýda.
Olımpıada segiz pán boıynsha ótkizilýde: qazaq tili men ádebıeti, orys tili men ádebıeti, aǵylshyn tili, fızıka, bıologııa, geografııa, dúnıejúzi tarıhy jáne hımııa. Olımpıadanyń eń joǵarǵy kórsetkishi - 100 ball.
Almaty qalasynda Qyzdar ýnıversıtetiniń Bas oqý ǵımaratynda ótip jatqan bilim saıysyn resmı túrde oqý orynnyń rektory Dınar Nóketaeva ashty. Oqý oryn basshysy jınalǵan qaýymǵa ýnıversıtet tarıhyn, tynys-tirshiligi men oqý, bilim, ǵylymdaǵy jetken jetistikterin qysqasha tanystyryp ótip, barsha qatysýshy oqýshylarǵa sáttilik tiledi.
«Qazaq memlekettik qyzdar pedagogıkalyq ýnıversıteti - respýblıkamyzda ǵana emes, burynǵy KSRO, qazirgi TMD elderi arasynda tek arýlarǵa arnalǵan jalǵyz joǵary bilim ordasy.
Oqý orny 70 jyl ishinde 60 myńnan asa pedagog daıyndap shyǵarǵan kıeli shańyraq. Qyzdar ýnıversıteti Ulttyq reıtıng boıynsha pedagogıkalyq joǵary oqý oryndary arasynda 2 orynǵa ıe. Qazirgi tańda ýnıversıtet sheteldik 31 JOO-men, Frantsııa, Túrkııa, Qytaı, Germanııa, Polsha, Sıngapýr, Reseı elderiniń ozyq tájirıbeli ýnıversıtettermen tyǵyz baılanys ornatqan. LAMS Ulybrıtanııa ýnıversıtetimen, Chester ýnıversıteti men AQSh-taǵy Mıssısıpıı memlekettik ýnıversıtetterimen qosdıplomdyq oqý baǵdarlamasyn iske asyryp otyr, ıaǵnı osy baǵdarlama boıynsha bitirgen stýdentter eki dıplom ala alady. Ýnıversıtet memlekettik lıtsenzııa negizinde 6 fakýltette 43 bakalavr, 23 magıstratýra, 4 PhD doktorantýra boıynsha pedagogıkalyq kadrlar daıarlaıdy. Oqý ornynda 700-ge jýyq oqytýshy-professorlar quramy dáris beredi. Baǵalaý «Ýnıver» júıesi arqyly júrgiziledi. Ýnıversıtet qabyrǵasyndaǵy ár kún, ár saǵatty oqýmen, izdenispen ótkizip, zaman talabyna saı, álemdik básekege qabiletti maman bolyp shyǵýǵa barlyq jaǵdaılar jasalǵan. 1 mln. asa kitap pen 700 myńǵa jýyq elektrondyq oqýlyqtary bar baı kitaphanamyz bar, ǵalamtor jelisi tegin qyzmet kórsetedi, barlyq oqý korpýstary men jataqhanalarǵa WI-FI jelisi tartylǵan. Sportpen aınalysýǵa da barlyq jaǵdaılar jasalǵan. Sport zaldarymyzdan ózge, barlyq jataqhanalarda trenajer zaldary ashylǵan. Qazir úlken basseın, 450 oryndy taǵy bir jańa jataqhana salynýda. Ónerli, shyǵarmashyl jastar úshin túrli úıirmeler jumys isteıdi. Memlekettik grant negizinde oqıtyn stýdentter túgeldeı jataqhanamen qamtamasyz etiledi, 3 mezgil tegin tamaqtanady. Qyzdar ýnıversıtetinde bizder tek pedagog mamandyǵyn daıyndap qana qoımaı, asyl jar, bolashaq ana bolýdyń qyr-syryn tanýǵa, ónegeli tárbıe alyp shyǵýǵa da tárbıeleımiz.
«Bir qyzdy tárbıeleý, bir ultty tárbıeleýmen birdeı», dep Elbasy aıtqandaı, Qyzdar ýnıversıteti bilimmen qatar, tárbıege de úlken mán beredi. Qazir sizderdiń aldaryńyzda qandaı kásippen shuǵyldansam eken degen jol aıryǵy tur. Muǵalimniń mamandyǵy qaı kezde de - eń jaýapty da qadirli, ár ýaqytta suranysqa ıe mamandyq bolyp tabylady. Sondyqtan, osy mamandyqty tańdap, ýnıversıtetimizdiń bedeldi stýdentteri bolady degen senim bildiremin», - dedi D. Nóketaeva.
Oqý oryn rektory sondaı-aq, dástúrge aınalyp kele jatqan Y.Altynsarın olımpıadasyn halyqaralyq deńgeıge kóterýdi josparlap otyrǵandyǵyn da málim etti.
Jeńimpazdar men júldegerler naýryz aıynda anyqtalyp, marapattalady. Olımpıadanyń ár páninen 1, 2, 3 oryndy ıelengen oqýshy tańdaǵan páni mamandyǵyna saı kelgen jáne UBT-ǵa qajetti ótý balyn alǵan jaǵdaıda shákirtaqysyz ýnıversıtet Rektorynyń grantyna ıe bolady. Al, júldeli oryn almaǵandarǵa, biraq Olımpıadanyń deńgeıinen ótkenderge QazMemQyzPÝ-ǵa birinshi kezekte qabyldanýǵa quqyq beretin sertıfıkattar tabys etilip, oqýǵa túsýge túrli jeńildikter jasalady. Olımpıada jumysynyń maksımaldy kórsetkishi - 100 ball.
