«Y.Altynsarın-2015» respýblıkalyq pándik olımpıadasy ótedi
ASTANA. QazAqparat - 27 aqpan kúni Qazaq memlekettik qyzdar pedagogıkalyq ýnıversıtetiniń uıymdastyrýymen elimizdiń 7 oblysynda mektep bitirýshiler arasynda respýblıkalyq «Y.Altynsarın-2015» pándik olımpıadasy ótedi. Bul týraly ýnıversıtettiń baspasóz qyzmetinen habarlady.
Oqý ornynyń basshysy Dınar Nóketaevanyń bastamasymen osymen tórtinshi jyl qatarynan uıymdastyrylyp otyrǵan bilim saıysynyń basty maqsaty - mektep bitirýshilerge mamandyq tańdaýǵa kómektesý, daryndy oqýshylardy aıqyndaý, jastar arasynda irgeli ǵylymı bilimdi damytý, bilimdi jastardyń óz qabiletterin júzege asyrýyna kómektesý, daryndy talapker qyzdardy Qazaq memlekettik qyzdar pedagogıkalyq ýnıversıtetine shaqyrý bolyp tabylady. Olımpıadanyń biregeı ereksheligi - oǵan tek qana qyz balalar qatysady. Bıyl da olımpıada segiz pán boıynsha: qazaq tili men ádebıeti, orys tili men ádebıeti, aǵylshyn tili, fızıka, bıologııa, geografııa, dúnıejúzi tarıhy jáne hımııa pánderi boıynsha ótkiziledi.
Olımpıada Almaty qalasynda; Almaty oblysynyń Taldyqorǵan, Jarkent qalasy men Raıymbek aýdanynyń Kegen aýylynda; Jambyl oblysyna qarasty Taraz qalasy men Qordaı aýdanynda; Ońtústik Qazaqstan oblysynyń Shymkent jáne Túrkistan qalasynda; Qyzylorda oblysynyń Qazaly, Jańaqorǵan, Qarmaqshy aýdandarynda, Qyzylorda qalasynda; sonymen qatar, Shyǵys Qazaqstan oblysynyń Semeı jáne Óskemen qalasynda jáne Qaraǵandy oblysy boıynsha Qaraǵandy qalasynda; sondaı-aq, Batys Qazaqstan oblysynyń Oral qalasynda jáne Atyraý qalasynda ótedi. Qazirgi ýaqytta olımpıadaǵa qatysýǵa tilek bildirýshi oqýshylardy tirkeý jalǵasýda. Aıta keteıik, nıet bildirýshiler QazMemQyzPÝ saıtynda tirkele alady jáne olımpıada týraly tolyq maǵlumatpen Qyzdar ýnıversıtetiniń saıtynan tanysa alady www.kazmkpu.kz. ).
Jeńimpazdar men júldegerler naýryz aıynda anyqtalyp, marapattalady. Olımpıadanyń ár páninen 1, 2, 3 oryndy ıelengen oqýshy tańdaǵan páni mamandyǵyna saı kelgen jáne UBT-ǵa qajetti ótý balyn alǵan jaǵdaıda shákirtaqysyz ýnıversıtet rektorynyń grantyna ıe bolady. Al, júldeli oryn almaǵandarǵa, biraq Olımpıadanyń deńgeıinen ótkenderge QazMemQyzPÝ-ǵa birinshi kezekte qabyldanýǵa quqyq beretin sertıfıkattar tabys etilip, oqýǵa túsýge túrli jeńildikter jasalady. Olımpıada jumysynyń eń joǵary kórsetkishi - 100 ball.
Esterińizge sala keteıik, byltyrǵy ótken «Y.Altynsarın-2014» olımpıadasyna 3 000-nan asa mektep bitirýshi oqýshylar qatysty. Onyń 24-i Rektor grantyna ıe bolsa, 10 paıyzdyq jeńildikke 718 oqýshy ilikti.
Olımpıadanyń saltanatty jabylý rásiminde, jeńimpaz atanǵan 11 synyp oqýshylarymen qatar, sapaly bilim bergen pán muǵalimderi, sondaı-aq, aımaqtarda olımpıadanyń ótýine jaǵdaı jasaǵan aýdandyq bilim bólimderi men oblystyq bilim basqarmalary qyzmetkerleri Rektordyń alǵyshatymen marapattalady.
