«Y.Altynsarın -2014» respýblıkalyq pándik olımpıadasy ótedi
ASTANA. QazAqparat - 27 aqpan kúni Qazaq memlekettik qyzdar pedagogıkalyq ýnıversıtetiniń uıymdastyrýymen elimizdiń 5 oblysynda respýblıkalyq «Y.Altynsarın - 2014» pándik olımpıadasy ótedi. Bilim saıysyna tek qana qyz balalar qatysady, dep habarlady bilim ordasynyń baspasóz qyzmetinen.
Bıyl olımpıada ádettegideı jeti pán boıynsha emes, segiz pán boıynsha ótkiziledi: qazaq tili men ádebıeti, orys tili men ádebıeti, aǵylshyn tili, fızıka, bıologııa, geografııa, dúnıejúzi tarıhy, hımııa. Olımpıada jumysynyń maksımaldy kórsetkishi - 100 ball.
Osymen úshinshi jyl qatarynan uıymdastyrylyp otyrǵan bilim saıysynyń basty maqsaty - mektep bitirýshilerge mamandyq tańdaýǵa kómektesý, daryndy oqýshylardy aıqyndaý, bilimdi jastardyń óz qabiletterin júzege asyrýyna kómektesý arqyly Qyzdar ýnıversıtetine oqýǵa tartý bolyp tabylady.
«Y.Altynsarın - 2014» dep atalatyn olımpıadadan joǵary nátıjege qol jetkizgen qyz balalarǵa Qazaq memlekettik qyzdar pedagogıkalyq ýnıversıtetine túsýge jol ashylady. Olımpıadanyń ár páninen alǵashqy úsh oryndy ıelengen oqýshy tańdaǵan mamandyǵyna saı kelgen jáne UBT-ǵa qajetti shekti baldy alǵan jaǵdaıda ýnıversıtet rektorynyń shákirtaqysyz grantyna ıe bolady. Júldeli oryn almaǵanymen, olımpıadanyń joǵary deńgeılerinen ótkenderge joǵary oqý ornyna birinshi kezekte qabyldanýǵa quqyq beretin sertıfıkattar tabys etiledi.
Bilim synaǵy 27 aqpan kúni saǵat 12.00-15.00 aralyǵynda Almaty qalasynda, Almaty oblysynyń Taldyqorǵan, Jarkent qalasy men Raıymbek aýdanynda, Jambyl oblysyna qarasty Taraz qalasy men Qordaı aýdanynda, Ońtústik Qazaqstan oblysynyń Shymkent jáne Túrkistan qalasynda, sonymen qatar, Qyzylorda oblysyna qarasty Qazaly, Jańaqorǵan, Qarmaqshy aýdandarynda, Shyǵys Qazaqstan oblysynyń Semeı qalasynda jáne Qostanaı oblysy boıynsha Qostanaı qalasynda ótedi. Qazirgi ýaqytta olımpıadaǵa qatysýǵa tilik bildirýshi oqýshylardy tirkeý jalǵasýda. Olımpıadaǵa qatysý jónindegi tolyq maǵlumatty Qyzdar ýnıversıtetiniń saıtynan alýǵa bolady.
Jeńimpazdar men júldegerler naýryz aıynda anyqtalyp, marapattalady.
Esterińizge sala keteıik, byltyr Y.Altynsarın olımpıadasynda 21 jeńimpaz rektor grantyn ıelengen bolatyn. Bıyl hımııa pániniń qosylýyna baılanysty grant sany 24-ke ósip otyr. Jalpy, ótken jyly bilim saıysyna 4 000-ǵa jýyq mektep bitirýshi oqýshylar qatysty.
Olımpıadanyń saltanatty jabylý rásiminde jeńimpaz atanǵan 11-synyp oqýshylarymen qatar, sapaly bilim bergen pán muǵalimderi, sondaı-aq, aımaqtarda olımpıadanyń ótýine jaǵdaı jasaǵan aýdandyq bilim bólimderi men oblystyq bilim basqarmalary qyzmetkerleri rektordyń alǵys hatymen marapattalady.
