XXV jazǵy Sýrdlımpıada oıyndarynyń júldegerlerine páter sertıfıkaty tabystaldy
ASTANA. KAZINFORM – Bıyl 15-25 qarasha aralyǵynda Tokıo (Japonııa) qalasynda ótken XXV jazǵy Sýrdlımpıada oıyndarynyń birqatar júldegerine páter sertıfıkaty berildi.
Atap aıtsaq, erkin kúresten 57 kg salmaqta kúmis medal jeńip alǵan Ǵabıt Esjanov , 74 kg salmaqta beldesken qola júldeger Ǵasyr Turǵynbaı, jekeleı synda qola, komandalyq esepte kúmis júldeger atanǵan Anna Kramorova, komandalyq synnyń kúmis medalin jeńip alǵan Ferıde Kara Ogly, sonymen qatar erler arasyndaǵy komandalyq jarysta qarsylastarynan oq boıy ozyp, altyn medalǵa qol jetkizgen Aıdos Túgelbaev bastaǵan qurama sportshylary bar.
XXV jazǵy Sýrdlımpıada oıyndarynyń jeńimpaz-júldegerlerine Taraz qalasynan 1, 2 jáne 3 bólmeli páter sertıfıkaty tabystaldy. Sonymen qatar jarysqa qatysýshy men olardyń jattyqtyrýshylaryna Túrkııa memleketinde ótetin saýyqtyrý oqý-jattyǵý jıynyna joldama tabystaldy.
Páter sertıfıkatyn Jambyl oblysynyń ákimi Erbol Qarashókeev tabystap, joǵary nátıjege qol jetkizýde aıanbaı ter tókken sportshylarǵa alǵysyn aıtyp, olardyń shyńdalýyna eńbek sińirgen bapkerlerge rızashylyǵyn bildirdi.
Erkin kúresten kúmis júlde ıelengen Ǵabıt Esjanov pen dzıýdodan jeke bapker Haırýlla Luqmanov memleket tarapynan kórsetilgen qoldaýdyń aldaǵy jetistikterge shabyt syılaıtynyn atap ótti.
Aıta keteıik, baıraqty básekede Qazaqstan ulttyq quramasy 8 altyn, 4 kúmis jáne 13 qola medal jeńip, 81 eldiń ishinde medaldik esepte 9-shy orynǵa turaqtaǵan bolatyn.
XXV jazǵy Sýrdlımpıada oıyndary Japonııa astanasy Tokıo qalasynda 15–26 qarasha aralyǵynda ótti. Bul — tórt jylda bir uıymdastyrylatyn estý qabileti zaqymdanǵan sportshylar arasyndaǵy eń bedeldi halyqaralyq jarys. Dodaǵa 81 elden 3000-ǵa jýyq sportshy qatysyp, 21 sport túri boıynsha 209 dıstsıplınada baq synady. Qazaqstan ulttyq quramasy 78 sportshymen 8 sport túrinen óner kórsetti.
Bıylǵy Sýrdlımpıadada Qazaqstan quramasy úshin eń nátıjeli sport túri sýrdo dzıýdo boldy. Bul synda otandastarymyz 5 altyn, 2 kúmis jáne 4 qola medal jeńip alyp, barlyǵy 11 júldege qol jetkizdi.
Erkin kúresten 1 altyn, 1 kúmis jáne 3 qola medal oljalansa, grek-rım kúresinde ulttyq qurama qorjynyna 1 altyn, 1 kúmis jáne 1 qola júlde tústi.
Jeńil atletıkada Qazaqstan 1 altyn jáne 1 qola medal enshilep, Faına Meırmanova bıiktikke sekirý saıysynda 1,79 metr nátıjemen Sýrdlımpıada rekordyn jańartty. Taekvondoshylar kerýgı dıstsıplınasynda 3 qola júlde ıelense, ústel tennısinen erler quramasy komandalyq synda qola medalǵa qol jetkizdi.