XXV qysqy Olımpıada oıyndarynyń ashylý saltanatynda Qazaqstan qashan shyǵady

ASTANA. KAZINFORM - Búgin Italııada bastalatyn XXV qysqy Olımpıada oıyndarynyń ashylý saltanatynda Qazaqstan quramasy rettik sany boıynsha qashan shyǵatyny belgili boldy.

Dúbirli doda 6-22 aqpan aralyǵynda ótkiziledi. Oǵan álemniń 90-nan astam elinen shamamen 2 900-3 500 sportshy qatysady. Baıraqty básekede 16 sport túri boıynsha 116 medal jıyntyǵy sarapqa salynady.

Qazaqstandyq kórermender búgin XXV qysqy Olımpıada oıyndarynyń saltanatty ashylý rásimin Astana ýaqyty boıynsha saǵat 23:50-den bastap Jibek Joly telearnasynyń tikeleı efırinen tamashalaı alady.

Saltanatty rásimde otandastarymyz rettik sany boıynsha 44-shi bolyp shyǵady.

Elimiz bıyl qysqy Olımpıada oıyndarynda 36 sportshyǵa úmit artyp, jalpy tizimde 24-orynǵa taban tirep otyr. Dúbirli dodada elimizdiń ulttyq quramasy sporttyń 10 túrinen 58 medal jıyntyǵy boıynsha baq synaıdy.

Olardyń qatarynda bıatlon, konkımen júgirý, mánerlep syrǵanaý, short-trek, taý shańǵy sporty, shańǵy qossaıysy, shańǵy jarystary, shańǵymen tramplınnen sekirý, frıstaıl-mogýl jáne frıstaıl-akrobatıka bar.

Bul tizimde Olımpıada oıyndary alǵash ótkizilgen Grekııa quramasy kósh bastasa, odan keıingi kezekte Albanııa, Andorra, Saýd Arabııasy, Argentına, Armenııa, Aýstralııa. Aýstrııa, Ázerbaıjan, Belgııa quramalary jankúıerlermen qaýyshady.