XXIII qysqy Olımpıada oıyndarynyń bastalýyna 100 kún qaldy
ASTANA.QazAqparat - 2018 jyly Ońtústik Koreıanyń Phenchhan qalasynda ótetin XXIII qysqy Olımpıada oıyndaryna 100 kún qaldy, dep habarlaıdy QazAqparat Ulttyq Olımpıada komıtetine silteme jasap.
QR Ulttyq Olımpıada komıtetiniń (UOK) habarlaýynsha, 1 qarasha kúni 19:00-de Astana qalasy ákimdigimen birlesip elordada «Olımpıada oıyndaryna deıin 100 kún» aktsııasyn ótkizedi. Sharanyń basty maqsaty - Olımpıadada el namysyn qorǵaıtyn otandyq sportshylardy qoldaý.
Aıta keterligi, Ońtústik Koreıa 2018 jylǵy qysqy Olımpıada oıyndaryn ótkizý mártebesin 2011 jyldyń 6 shildesinde Halyqaralyq Olımpıada komıtetiniń Dýrbandaǵy 123-sessııasynda jeńip aldy. Bul Koreıa Respýblıkasynyń alǵashqy, Azııa qurlyǵynda úshinshi qysqy Olımpıada oıyndary bolyp otyr. Al buǵan deıin Japonııanyń Sapporo (1972) men Nagano (1998) qalalary eki ret qysqy Olımpıada oıyndaryn qabyldaǵan edi.
Phenchhan qysqy Olımpıadany ótkizýge úsh ret ótinish bildirip, 2010 jyly Vankýverge jáne 2014 jyly Sochı qalasyna jol berdi.
2018 jylǵy Olımpıada oıyndaryna 95 ulttyq Olımpıada komıtetiniń atynan 2 900 sportshy qatysady dep kútilýde. Sondaı-aq, qysqy sporttyń 15 túrinen jalpy 102 medal jıyntyǵy sarapqa salynady.
Eske sala keteıik, XXIII qysqy Olımpıada oıyndary alaýy 2018 jyly 9 aqpan kúni Phenchhan qalasynda tutanady. Álem dodasy 25 aqpanǵa deıin jalǵasady.
