XXII Qysqy Olımpıada oıyndarynda kıetin kıim úlgileri baıqaýynyń úzdik úsh jobasy anyqtaldy
ASTANA. 28 mamyr. QazAqparat - Qazaqstannyń ulttyq quramasynyń 2014 jyly Reseıdiń Sochı qalasynda ótetin XXII Qysqy Olımpıada oıyndaryna kıetin kıim úlgileri boıynsha ashyq baıqaýdyń birinshi kezeńi aıaqtaldy.
Bul týraly búgingi baspasóz máslıhatynda QR Sport jáne dene shynyqtyrý isteri agenttiginiń resmı ókili Dıas Ahmetshárip málim etti.
Onyń habarlaýynsha, sońǵy on kúnniń ishinde Qazaqstannyń túkpir-túkpirinen 19 joba kelip tústi. Túrkistandyq dızaıner Murat Málikuly alǵashqylardyń biri bolyp óz ótinishin joldady. Odan keıin Almaty, Atyraý, Astana, Qostanaı, Oral, Qaraǵandy jáne Jambyl oblystarynyń jobalary túse bastady. Baıqaýǵa qatysýǵa nıet bildirgenderdiń ishinde AQSh-tyń Los-Anjeles jáne Qytaıdyń Beıjiń qalasynda turatyn úmitkerler de bar. Olar - sol jaqta oqyp jatqan qazaqstandyq stýdentter. «Baıqaýdyń birinshi kezeńi boıynsha biz úsh jumysty iriktep aldyq. Birinshisi - Beıjińde oqyp júrgen taldyqorǵandyq Doý Gýan Chjoý Taıstiń jobasy, ekinshisi - Atyraý qalasyndaǵy «Aıoko Bo» sán úıiniń jumysy, al úshinshisi - tanymal «Zıbrý» kompanııasynyń kıim úlgileri. Qazirgi kezde osy jumystar www.sport.gov.kz saıtyna shyǵaryldy. Úsh kún ishinde qazaqstandyqtar olardy baǵalap, daýys bere alady. Sonyń qorytyndysy boıynsha mamyrdyń 30-y kúni jeńimpaz anyqtalady», - deıdi D.Ahmetshárip. Jeńimpaz XXII Qysqy Olımpıada oıyndarynyń joldamasyna ıe bolsa, 2-3-shi oryn alǵandarǵa olımpıadalyq kıim-keshek jıyntyǵy tabystalady.
