XXII Qysqy Olımpıada oıyndaryna qatysatyn árbir qazaqstandyq sportshyǵa 500-600 myń teńgeniń kıim-keshegi tigiledi

Bul týraly búgingi baspasóz máslıhatynda QR Sport jáne dene shynyqtyrý isteri agenttiginiń resmı ókili Dıas Ahmetshárip málim etti.

Onyń aıtýynsha, Vankýver Olımpıadasy kezinde árbir qazaqstandyq sportshynyń kıim-keshegine 370 myńǵa jýyq qarjy ketse, osy jolǵy Sochı Olımpıadasy aıasynda bir sporttyq kıim-keshek qorjynyna 500-600 myń teńge jumsalmaq. «Bul tek memlekettiń aqshasy ǵana emes. Onyń ishinde demeýshilerdiń qarjysy da bar. Al kıim-keshek qorjynynda shulyqtan bastap bas kıimge deıingi sporttyq kıim-keshek jıyntyǵy bolady», - dep atap kórsetti D.Ahmetshárip.

Qazaqstan quramasynyń XXII Qysqy Olımpıada oıyndarynda kıetin kıim úlgilerin tańdaý kezinde onyń túsine erekshe mán beriledi. Sebebi memlekettik týǵa saı keletin dástúrli kók pen sary túster aralas sporttyq kıimmen shyqqan kezde, qazaqstandyq sportshylardy Ýkraına men Shvetsııa quramalarymen shatastyryp jatady.