«XXI ǵasyrdyń mýzykalyq qubylysy»: sheteldik basylym Dımash týraly jazyp jatyr
ASTANA. KAZINFORM - Dımash Qudaıbergenniń álemdik «Stranger» kontserti týrynyń jalǵasy Nıý-Iorktegi áıgili Madison Square Garden sahnasynda ótti. Ánshiniń AQSh pen Meksıkada ótken kontserti týraly sheteldik buqaralyq aqparat quraldary áli jazyp jatyr. Olar qazaqstandyq ártistiń ónerinen alǵan erekshe áseri men este qalar sátterdi atap ótti. Bul týraly dimashnews.com jazdy.
Kaspıı mańy elderi, Ońtústik Kavkaz jáne Ortalyq Azııadaǵy oqıǵalar jóninde analıtıkalyq maqalalar men jedel jańalyqtar jarııalaıtyn ázerbaıjandyq aqparattyq-taldamalyq Caspian Post portaly ánshi týraly materıal jarııalady.
Basylymnyń «Dımash Qudaıbergen Madison Square Garden-de ótken tarıhı kontsertte Qazaqstannyń daýysyn tanystyrdy» atty maqalasynda ártistiń óner kórsetýiniń mádenı mańyzy erekshe atap ótilgen.
- Tarıhta alǵash ret Madison Square Garden sahnasynda Qazaqstan Respýblıkasynyń Memlekettik gımni shyrqaldy. Bul – áıgili ártis Dımash Qudaıbergenniń jeke kontsertimen shyqqan aıtýly sát boldy. Bul kesh tek mýzykalyq aıtýly oqıǵa emes, sondaı-aq, mádenı qubylysqa da aınaldy. Álemniń túkpir-túkpirinen kelgen myńdaǵan tyńdarman Shyǵys pen Batystyń, dástúr men zamanaýılyqtyń toǵysqan úılesimin tamashalady. Dımash Qudaıbergenniń tarıhı keshi Qazaqstannyń álemdik mýzyka sahnasyndaǵy jańa kezeńin bastap, ónerdiń shekarasyz, shynaıy jáne biriktirýshi kúsh ekenin taǵy bir dáleldedi, - delingen basylym málimetinde.
Sonymen qatar Dımashtyń Meksıkadaǵy alǵashqy jeke kontserti tek ánshiniń jankúıerleri arasynda ǵana emes, jergilikti buqaralyq aqparat quraldarynyń da zor qyzyǵýshylyǵyn týdyrdy. Alǵashqy kontsert qarsańynda «adn Noticias» telearnasy Dımashty arnaıy suhbatqa shaqyrdy. Baǵdarlama júrgizýshisi Gabrıel Ernandes kórermenge óz áserin bólisti.
- Elestetip kórińizdershi, qazaq ánshisi ári kompozıtor Dımash Qudaıbergen dál qazir Mehıkoda! Uzaq jyldar boıyna kútken ánshimiz «Dears» atty fan-klýbtyń eńbeginiń nátıjesinde óz jankúıerlerimen tabysty. Dımash óziniń álemdik deńgeıdegi tanymaldyǵyn dáleldep, Auditorio Nacional zalyn sanaýly mınýttarda, al Palacio de los Deportes-ti odan da jyldam ýaqytta toltyrdy, - deıdi ol.
Birinshi kontsertten keıin Televisa Espectáculos telearnasy reportaj jarııalady.
- Dımash Qudaıbergen kontsert zalyn adamzatqa úndeý joldaıtyn erekshe daýsymen tańǵaldyrdy.Álem moıyndaǵan onyń áýenderi bir arnaǵa jınalǵan ondaǵan myń kórermenniń júregin terbetti.«Stranger» («Beıtanys») dep atalatyn týryna qaramastan, Dımash meksıkalyqtar úshin bóten emes. Kórermen ony erekshe yqylaspen, shynaıy súıispenshilikpen qarsy aldy. Eki saǵattan astam ýaqyt boıy sahna naǵyz mýzykalyq ǵıbadathanaǵa aınaldy. Bul jaı ǵana kontsert emes, shynaıy ónerdiń, sıqyr men rýhanı tolǵanystyń alańy boldy. Dımash áserge bólenip, meksıkalyq kórermenderge ıspan tilinde alǵysyn bildirdi. Kóptegen kostıým aýystyrýlar, alyp ekrandar men horeografııalyq toptyń qatysýy arqasynda shoý kórermendi tildik jáne mádenı shekaralardan asyp ótetin mýltısensorlyq saparǵa jeteledi. Sebebi týrdyń ataýy «Stranger» bolsa da, onyń mýzykasy álemdi birlikke shaqyryp, adamzatty adamgershilikke baýlyp, kórermen janyn tereń tebirentedi, - deıdi reportajda ánshi týraly.
Meksıkanyń bedeldi El Economista Mexico gazeti «Dımash Qudaıbergen Meksıkada: mýzyka: Qazaqstanmen mádenı jáne dıplomatııalyq kópir» atty maqalasynda kontserttiń mańyzdy mádenı jáne geosaıası qyrlaryna toqtaldy.
- Álemniń túkpir-túkpirinde myńdaǵan tyńdarmany bar Dımash óz eliniń mádenı elshisi retinde tanyldy. Ol Ortalyq Azııa óneriniń baılyǵyn alýan túrli aýdıtorııaǵa jetkize aldy. Onyń erekshe stıli – opera, zamanaýı pop jáne dástúrli qazaq mýzykasynyń úılesimi – meksıkalyq tyńdarmanǵa qazaq mádenıeti men ulttyq bolmysyn sezinýge múmkindik berdi. Qazaqstan elshiligimen kezdesý barysynda «Dımashtyń ár kontserti – mádenı almasý. Onyń óneri arqyly meksıkalyqtar Qazaqstannyń tarıhy men rýhyna jaqyndaı alady, - dep atap ótti. «Dımash fenomeni» mádenı yqpaldyń, ıaǵnı jumsaq kúshtiń, saıası jáne ekonomıkalyq baılanystardan tys eki el arasyndaǵy dostyqty nyǵaıtýdyń jarqyn mysalyna aınaldy. Qazaqstan úshin bul Latyn Amerıkasyndaǵy gastrol tek mádenı tanystyrylym emes, sonymen qatar, óziniń mýzykalyq alýandyǵy men oryndaýshylyq dástúrlerimen tanylǵan Meksıkamen shyǵarmashylyq dıalog ornatýǵa baǵyttalǵan mańyzdy qadam, - dep jazylǵan materıalda.
Marie Claire México jýrnaly «Juldyzdar» aıdarynda mynadaı suraq qoıady da, sol suraqqa ózi bylaısha jaýap beredi: «Dımash Qudaıbergen kim? Meksıkany óz ónerimen baýrap alǵan qazaq ánshisi».
Maqala Dımashtyń Meksıkadaǵy ekinshi kontserti qarsańynda jaryq kórdi.
– Dımash Qudaıbergen – ǵalamat vokaldyq dıapazon ıesi, opera, pop jáne dástúrli qazaq mýzykasy janrlaryn sheber úılestire bilgen qazaq ánshisi. Ol onnan astam tilde án oryndap, óz daýsymen ár týyndyǵa erekshe áser men emotsııalyq tereńdik beredi.8 qazan kúni Dımash Auditorio Nacional sahnasynda óner kórsetti, al búgin, 10 qazanda, ol Palacio de los Deportes arenasynda eki saǵattan astam ýaqytqa sozylatyn kontsert ótkizedi. XXI ǵasyrdyń erekshe mýzykalyq qubylysy: zamanaýı mýzykany óz joly retinde tańdaǵan Aqtóbeden shyqqan 31 jastaǵy qazaq ánshisi, kompozıtor jáne mýltıaspapshy, klassıkalyq mýzyka boıynsha tereń bilimi bar ártis, - dep jazylǵan materıalda.
Taǵy bir meksıkalyq Es Ahora AM basylymyndaǵy «Meksıka ony janymen qabyldady»: ǵajaıyp daýysynyń arqasynda shekaralardy joıǵan Dımashtyń kontserti» atty maqalada Dımashtyń meksıkalyq kórermenge bergen erekshe syıyn atap kórsetedi.
– Dımash «Bésame Mucho» ánin oryndaǵanda, búkil Meksıka tańdanysyn jasyra almady. Bul jaı ǵana kezekti kaver emes edi — bul naǵyz qurmet, mýzykalyq trıbıýt boldy. Alty oktavany qamtıtyn daýysy bul ándi múlde jańa deńgeıge kóterdi. Vokal mamany Sesı Doverdiń bul oryndaýǵa: «Bul án, sirá, dál soǵan arnap jazylǵandaı» degen pikiri jelide tez tarap, vırýsqa aınalyp ketti, - dep jazylǵan maqalada.
Dımash Qudaıbergenniń Mehıkodaǵy kontserti anshlagpen ótkenin jazǵan bolatynbyz.
Ánshi kórermenge jańa týyndysyn usyndy.