«XXI ǵasyr kóshbasshysy»: Talaı júıriktiń tusaýyn kesken telejoba ekranǵa qaıta oralady
ASTANA. KAZINFORM – Kópshilik kórermenge tanymal oqýshylar arasyndaǵy «XXI ǵasyr kóshbasshysy» ıntellektýaldyq oıyny teleekranǵa jańa formatta qaıta shyǵady.
«Habar» agenttigi men QR Oqý-aǵartý mınıstrliginiń «Daryn» RǴPO birlesip, megajobany qaıta jańǵyrtýǵa kiristi. Joba kóktemnen bastap «Habar» telearnasynyń efırinen kórsetile bastaıdy.
Oqý-aǵartý mınıstrliginiń málimetinshe, atalmysh joba – elimizdiń bolashaq kóshbasshylaryn tárbıeleýge baǵyttalǵan jastar qozǵalysy. Qazirdiń ózinde júzdegen daryndy oqýshy shaqyrýdy qabyldap, qyzyqty ıntellektýaldyq oıynnyń qatysýshylaryna aınaldy. Ár oblystaǵy irikteý kezeńderi 2024 jyldyń qazan aıynda bastalyp, 2025 jyldyń aqpan aıyna deıin jalǵasady.
Óńirlerden iriktelgen eń úzdik bes oqýshy respýblıkalyq kezeńge qatysýǵa múmkindik alady, ol osy jyldyń naýryzynan bastap maýsym aıyna deıin ótedi.
Jas daryndardyń bilimi men qabiletin jalpy buqaraǵa kórsetýge múmkindik beretin televızııalyq joba «Habar» Agenttiginiń 30 jyldyǵyna oraı ótkizilip otyr. Eń úzdik úsh jeńimpazǵa elimizdiń joǵary oqý oryndarynda oqýǵa granttar tabystalady.
Qazirdiń ózinde Pavlodar, Qaraǵandy, Abaı, Aqmola, Túrkistan, Jambyl, Batys Qazaqstan, Shyǵys Qazaqstan, Ulytaý, Qyzylorda, Atyraý jáne Mańǵystaý oblystarynan, sondaı-aq Astana jáne Shymkent qalalarynan respýblıkalyq týrǵa qatysatyn úzdik bestikter anyqtaldy. Almaty, Aqtóbe, Jetisý, Soltústik Qazaqstan, Qostanaı oblystarynda jáne Almaty qalasynda irikteý kezeńderi qańtar-aqpan aılarynda ótedi.
«XXI ǵasyr kóshbasshysy» - jas daryndarǵa jańa múmkindikter beretin biregeı alań. Intellektýaldyq oıyn bilimdi ári talantty jastardy qoǵamǵa tanystyryp qana qoımaı, shalǵaı eldi mekenderden shyqqan daryndy jasóspirimder úshin úlken áleýmettik lıft bolatynyna senim bar.
Telejoba alǵash ret 25 jyl buryn usynylǵan. Osy ýaqyt ishinde ol otandyq televızııadaǵy úzdik jobalardyń biri retinde tanyldy. Búginde osy jobaǵa qatysqan kóptegen jastar óz joldaryn taýyp, óner men mádenıetten bastap qoǵamdyq qyzmet pen bızneske deıin túrli salada kásibı mamandar retinde tanyldy.
Astanalyq oqýshylar este saqtaý qabileti bar aqyldy rozetka jasap shyǵarǵanyn jazǵan bolatynbyz.