XX ǵasyrdaǵy kompozıtorlardyń mýzykasy «Astana Opera» sahnasynda shyrqalmaq
ASTANA. QazAqparat - «XX ǵasyrdaǵy kompozıtorlardyń mýzykasy» atty ásem kontsert Kameralyq zaldyń sahnasynda 28 aqpanda ótedi, dep habarlaıdy «Astana Opera» teatrynyń baspasóz qyzmeti.
Keshte ótken júzjyldyqtaǵy amerıkandyq, batystyq jáne keńestik mektepter kompozıtorlarynyń shyǵarmalary usynylady.
«Osy bir ǵajap keshte kórnekti kompozıtor E. Morrıkoneniń janyńa tynyshtyq syılaıtyn asyl mýzykasy kúıbiń tirshiliktiń taýsylmaıtyn máselelerin bir sátke umyttyryp, rýhanı azyq bolady. Shlıagerge aınalǵan «Mıssııa» kınofılmindegi «Goboı Gabrıeldiń» týyndysy tyńdarmanǵa basty keıipker Gabrıeldiń erekshe oqıǵasyn baıandap beredi. Atalǵan fılm búginde kópshilik úshin umyt bolǵan, alaıda bul kınematografııalyq shyǵarmaǵa jazylǵan mýzykanyń taǵdyry erekshe, sebebi kúni búginge deıin ol tanymal ári súıikti ánderdiń birine aınalyp, óz ómirsheńdigin kórsetip keledi», - delingen habarlamada.
Kontserttiń jeńil, názik áýenderi jyldam ári yrǵaqty áýenmen almasady. Bar ǵumyrlaryn klassıkalyq mektepke arnaǵan B. Brıtten, S. Prokofev, I. Stravınskıı syndy kompozıtorlardyń salmaqty týyndylary tyńdarmannyń júregin selt etkizbeı qoımaıdy. Munymen qatar kontsertte qazaqstandyq kompozıtorlar H. Setekov pen A. Muhıtdınovtiń shyǵarmalary shyrqalady.
Amerıka mektebiniń ókili Dj. Gershvınniń jarqyn týyndylarynyń biri - kóbine blıýzdik óńdeýi tanymal, «Porgı jáne Bess» operasyndaǵy Klaranyń besik jyry «Astana Opera» kórermenine baıyrǵy klassıkalyq nusqada pash etiledi. Trombonnyń qulaǵynda oınaıtyndyǵy úshin Paganınıge balanatyn kompozıtor K. Lındbergtiń shyǵarmashylyǵy, trombon men ishekti orkestrdiń oryndaýynda Arabenne týyndysynda usynylady.
«Astana Opera» teatrynyń solısteri: Almat Jaılaýbaev, Elena Ganja, Aısulý Baıkenova, Baǵdat Ábilhanov keshtiń ajaryn ashady.
Mýzykatanýshy Sáýle Máýletova XX ǵasyrdyń mýzykasy kúrdeli, kóp qyrly jáne áralýan ekenin atap ótti. «Atalǵan kontsertte qazaqstandyq aýdıtorııaǵa keńinen tanymal ataqty shyǵarmalar shyrqalady. Kontsert aspapshylardyń oınaý qabiletin kórsetýdi jáne kórermenniń boıyna joǵaryda usynylǵan kompozıtorlardyń mýzykasyna degen súıispenshilikti sińirýdi kózdeıdi. Sondaı-aq kontsertte Heılıdiń óleńderi oqylady», - deıdi Sáýle Máýletova.
«Astana Operanyń» Kameralyq orkestrine dırıjerlik etetin - Respýblıkalyq konkýrstar syılyǵynyń laýreaty Rýslan Baımurzın.
