XVII ǵasyrdaǵy «Ǵalam kartasy» Sotheby’s aýktsıonynda $2,75 mln-ǵa satyldy
ASTANA. KAZINFORM – Londonda ótken Sotheby’s aýktsıonynda XVII ǵasyrdyń sırek jez astrolıabııasy 2 mln fýnt sterlıngke (shamamen $2,75 mln) satyldy, dep habarlaıdy VVS.
Ǵalymdar bul quraldy Uly Moǵoldar dáýiriniń «portatıvti astronomııalyq kompıýteri» dep ataıdy. BBC málimetinshe, sońǵy baǵa 2 mln fýnttan asyp, ıslam álemine tıesili osyndaı jádigerler arasynda rekord ornatty.
Eksponat Djaıpýr maharadjasy Savaı Man Sıngh II-niń kollektsııasyna tıesili bolǵan, keıin onyń jubaıy Maharanı Gaıatrı Devıge ótken jáne jeke jınaqta saqtalǵan. Aýktsıonǵa deıin ol kópshilikke usynylmaǵan.
Astrolıabııa Lahorda Lahor mektebiniń eki sheberi tarapynan jasalǵan. Mamandardyń aıtýynsha, ol óz túrindegi eń iri saqtalǵan úlgilerdiń biri sanalady: salmaǵy shamamen 8 kg, dıametri 30 sm-ge jetedi.
Bul qural ýaqytty anyqtaý, navıgatsııa, astronomııalyq esepteýler júrgizý, sondaı-aq Mekkege baǵytty aıqyndaý sııaqty dinı mindetter úshin paıdalanylǵan.
Sarapshylar astrolıabııany «Ǵalamnyń eki ólshemdi modeli» dep atap, fýnktsıonaldyǵy jaǵynan zamanaýı smartfonmen salystyrady.
Qurylǵynyń betine 94 qalanyń koordınattary men 38 juldyzdyq baǵdar qashalyp jazylǵan. Bólinisteriniń dáldigi gradýs úlesterine deıin jetedi. Bul Uly Moǵoldar dáýirindegi ǵylym men qolónerdiń joǵary deńgeıin kórsetedi.
Sotheby’s dereginshe, lotqa kollektsıonerler men mýzeıler tarapynan qyzyǵýshylyq joǵary bolǵan. Sońǵy baǵa 2014 jyly shamamen 1 mln fýntqa satylǵan, kólemi áldeqaıda kishi osmandyq astrolıabııanyń rekordyn jańartty.
Aıta keteıik, buǵan deıin Pablo Pıkassonyń $1 mln turatyn kartınasy Parıj turǵynyna nebári 100 eýroǵa buıyrǵany habarlanǵan.
