XV Paralımpıada oıyndarynyń júldegeri Raýshan Qoıshybaeva: Meniń jeńisim - táýelsizdigimizge tartý

ASTANA. QazAqparat - Bıylǵy jyl bizdiń elimiz úshin óte tabysty jyl boldy. Ásirese, sport salasy úshin jetistikterge toly jyl boldy deýge bolady. Olaı deıtinimiz, ózge sport túrin bylaı qoıǵanda XV Paralımpıada oıyndarynyń ózinde buryn-sońdy bolmaǵan bıikterdi baǵyndyrdyq. Sonyń dáleli - Zúlfııa Ǵabıdýllınanyń tarıhı altyny jáne Raýshan Qoıshybaevanyń kúmisi. Biz búgin sol Rıo-de-Janeıro qalasyna ótken XV Paralımpıada oıyndarynyń jeńimpazy Raýshan Qoıshybaevanyń shaǵyn suhbatyn nazarlaryńyzǵa usynamyz.

Osy oraıda aıta ketetin jaıt, Raýshan barlyq qatysýshylar arasyndaǵy eń jasy eresek sportshy. Ol 1966 jyly týǵan. Raýshan 1990 jyly aýyr jaraqattan soń eki tizesinen aıyrylǵan. Sodan beri múmkindigi shekteýli jandardyń qatarynda. Paýerlıftıngpen 2010 jyldan beri aınalysady. 3 bala tárbıelep otyrǵan ana.

- Bıyl el táýelsizdiginiń 25 jyldyq mereıtoıyna sizde tarıhı jeńisińizben úles qostyńyz. Júldeger bolǵan kezińiz esińizden ketpeıtin de bolar?

- Ol máńgi esimnen ketpeıtini anyq. Rıoǵa attanar kezde ózderińiz bilesizder, bizdi Elbasy Nursultan Ábishuly qabyldap, aq jol tilep shyǵaryp salǵan bolatyn. Sol kezdesý jeke óz basyma úlken qýat berip, mańyzdy mindet júktedi. Buryn bilesizder ǵoı, Paralımpıadashylarǵa degen kózqaras nemquraıly bolatyn. «Biter istiń basyna, jaqsy keler qasyna» - degendeı bizdiń mınıstrimiz Arystanbek Muhamedıuly men Ulttyq Paralımpıada komıtetiniń prezıdenti Qaırat Boranbaevtardyń atsalysýymen múgedek sportshylarǵa degen yqylas artyp, jumys óte joǵary deńgeıge kóterildi. Rıoda jarystyń aldynda árıne qatty qobaljydym. Sebebi artymda qalǵan el úmit artyp otyrǵanyn sezinesiń, bapkerlerdiń, basshylyqtyń, úkimettiń jasap otyrǵan eńbegin aqtaý kerek. Jarys kezinde  sol jaqta júrgen bizdiń delegatsııa músheleri de jany qalmaı qoldaý kórsetti.

- Sol kezdegi qýanyshyńyzdy qazir tilmeı aıtyp jetkize alasyz ba?

- Jetkize almaıtyn shyǵarmyn. Eń bastysy Qazaqstandy álemge tanytýǵa óz úlesimdi qosa alǵanym úshin ózimdi baqytty sportshymyn dep esepteımin. Paralımpıada oıyndary aıaqtalyp elge oralǵanda, janushyryp, qýanyshtary qoınyna syımaı áýejaıdan kútip alǵan aǵaıyndy kórgende kózime jas úıirildi. Ol qýanyshtyń jasy bolatyn.

- Bul jeńisińiz táýelsizdiktiń 25 jyldyq mereı toıymen tuspa-tus kelgenin maqtan tutatyn bolarsyz?

- Árıne, meniń jeńisim táýelsizdigimizge tartý boldy. Osy eńbegimiz baǵalanyp, biz básekege túsip jatqan kezde mınıstrlik pen Paralımpıada komıtetiniń basshylary múmkindigi shekteýli sportshylarǵa beriletin aqshalaı syıaqynyń kólemin Olımpıada oıyndarynyń jeńimpazdarynyń syıaqysymen teńestirý jumysyn qolǵa alǵan eken. Biz elge kelgende Úkimet, mınıstrlik jáne Paralımpıada komıteti bul jumysty aıaqtap qaldyq, endi sizder Olımpıadashylarmen birdeı syıaqy alasyzdar degende qalaı qýanǵanymdy bilseńizder ǵoı. Bul men sııaqty kóptegen múmkindigi shekteýli jandardyń sportqa tartylyp, salaýatty ómir saltyna bet burýyna úlken serpilis beretin saýapty is.

- Táýelsizdik meıramyn qalaı atap ótkeli jatyrsyz?

- Óte joǵary kóńil-kúımen qarsy alýdamyn. Sebebi, bizdiń osy jeńisimizdiń barlyǵy el Táýelsizdiginiń arqasy dep bilemin. Bıylǵy bizdiń jeńisimiz táýelsizdigimizdiń 25 jyldyq mereıtoıyna tartý boldy. Paralımpıadashylardyń syıy - jaqsy jetistikter edi. Rıoǵa barǵan 11 sportshynyń árqaısysy baryn salyp synǵa tústi.

Merekemiz qutty bolsyn, el mereıi ústem bolyp, Qazaqstannyń abyroıy asqaqtaı bersin, halqymyz aman bolyp, qudaı bizdi tynyshtyǵynan aıyrmasyn degen tilegim bar.