XIV Leo AQSh-taǵy saılaýda daýys bergen alǵashqy Rım papasy bolýy múmkin
ASTANA. KAZINFORM — Rım papasy XIV Leo 3 qarashada ótetin AQSh Kongresine aralyq saılaýda poshta arqyly daýys berý úshin bıýlleten suratqan. Eger pontıfık daýys berse, ol basqa memlekettegi saılaýǵa qatysqan alǵashqy qyzmettegi Katolık shirkeýiniń basshysy atanýy múmkin. Bul týraly Kazinform agenttigi Euronews basylymyna silteme jasap habarlady.
Basylymnyń málimetinshe, bıýlleten alýǵa ótinish 3 qazanda AQSh-tyń Illınoıs shtatyndaǵy Ýıll okrýginiń ákimshiliginde tirkelgen.
Pontıfık saılaýshylar tizimine óziniń shyn esimi Robert Frensıs Prevostpen engizilgen. Ol Nıý-Lenoks qalasynda turatyn aǵasy Djonnyń mekenjaıy boıynsha tirkelgen. XIV Leo AQSh, Perý jáne Vatıkan azamattyǵyna ıe.
Bul týraly alǵash ret 23 qazanda jergilikti WJOL radıostantsııasy habarlaǵan. Onyń málimetinshe, ótinishti pontıfıktiń jaqyn ortasyndaǵy ókilderdiń biri bergen.
Rım papasynyń toltyrylǵan bıýlletendi jibergen-jibermegeni ázirshe belgisiz. Onyń daýys bergeni rastalsa, XIV Leo basqa memlekettiń saılaýyna qatysqan alǵashqy qyzmettegi pontıfık bolýy múmkin.
XIV Leo AQSh Kongresiniń Ókilder palatasy men Illınoıs shtaty Senatyna, sondaı-aq shtat gýbernatory men jergilikti bılik organdaryna saılaýǵa qatysýǵa quqyly.
Euronews-tiń jazýynsha, Katolık shirkeýiniń basshysy bolyp saılanǵanǵa deıin Robert Prevost AQSh-taǵy saılaýlarǵa birneshe ret qatysqan. Ol 2012, 2014, 2018 jáne 2024 jyldardaǵy jalpyhalyqtyq saılaýlarda daýys bergen. Sondaı-aq Demokratııalyq jáne Respýblıkalyq partııalardyń bastapqy saılaýyna qatysqan.
Alaıda qyzmettegi pontıfıktiń basqa memlekettiń saılaýyna qatysýy onyń Vatıkan basshysy retindegi mártebesine qatysty suraqtar týyndatady. Lateran kelisimine sáıkes, Qasıetti Taq memleketter arasyndaǵy zaıyrly daýlarǵa aralaspaý qaǵıdatyn ustanady.
Eske salaıyq, buǵan deıin Kazinform halyqaralyq sholýshysy 3 qarashada ótetin AQSh-taǵy aralyq saılaý Donald Tramptyń saıası jaǵdaıyna qalaı áser etýi múmkin ekenin túsindirgen edi. Daýys berý kezinde amerıkalyqtar Ókilder palatasynyń barlyq múshesi men Senattyń 35 múshesin saılaıdy.
