XIV qysqy Paralımpıada oıyndaryna SQO-dan 5 sportshy qatysady
PETROPAVL. KAZINFORM – Soltústik Qazaqstan oblysynda Italııada ótetin 14-shi qysqy paralımpıada oıyndaryna sportshylardy saltanatty túrde shyǵaryp saldy.
Oblystyq ákimdikte ótken is-sharaǵa olımpıadaǵa atanǵaly otyrǵan sportshylar, jattyqtyrýshylar, sport ardagerleri qatysty.
SQO ákimi Ǵaýez Nurmuhambetovtyń aıtýynsha, 6-15 naýryz aralyǵynda Italııada ótetin XIV qysqy Paralımpıada oıyndaryna elimiz jalpy 10 lıtsenzııa alsa, sonyń jeteýin SQO sportshylary ıelenip otyr. Onyń beseýi – shańǵy jarysy, ekeýi – bıatlon boıynsha.
Ulttyq komanda quramynda Erbol Hamıtov, Aleksandr Gerlıts, Sergeı Ýsoltsev, Vladıslav Kobal óner kórsetedi.
– Bul orasan eńbek pen tabandylyqtyń nátıjesi, ári barshamyz úshin úlken maqtanysh. Bizdiń sportshylar laıyqty óner kórsetip, jeńis tuǵyrynan kórinip keledi. 17 aqpan kúni qosymsha qatysýshylar týraly habarlanady. Oǵan bizdiń Denıs Zınov enedi degen úmittemiz. Sizderdi jeńip alǵan lıtsenzııalaryńyzben quttyqtaımyn. Sizderdiń eńbekterińiz ben jeńiske degen yntalaryńyz qaısar rýh pen asqaq maqsatqa umtylysty kórsetedi. Sizderdiń jeńisterińiz sporttaǵy jetistik qana emes, barlyq qoǵamǵa qıyndyqty jeńýdiń úlgisi, - dedi Ǵaýez Nurmuhambetov.
Sondaı-aq XHV qysqy Olımpıada oıyndaryna soltústikqazaqstandyq sportshy Nadejda Morozova konkımen júgirýden qatysady.
Óńir basshysynyń aıtýynsha, oblysta ınklıýzıvti sportty damytýǵa barlyq jaǵdaı júıeli túrde jasalyp keledi. Múgedektigi bar adamdardyń «Úmit» klýby jumys isteıdi. «Samuryq-Qazyna» korporatıvtik ortalyǵy jáne «Qazaqstan halqyna» korporatıvtik qorynyń qoldaýymen Petropavlda sporttyq-saýyqtyrý ortalyǵyn salý josparlanǵan.
Buǵan deıin HOK qysqy Olımpıada oıyndarynyń merzimin aýystyrýdy qarastyryp jatqanyn jazǵan edik.