XII «Eýrazııa» kınofestıvalinde tuńǵysh ret arab kınolary kórsetiledi
ALMATY. QazAqparat - Ońtústik astanada 24-30 qyrkúıek aralyǵynda shartaraptan keletin kıno maıtalmandaryn qabyldaýǵa ázirlik júrip jatyr.
Elimizde on ekinshi ret ótkizilip otyrǵan aýqymdy mádenı shara - Eýrazııa kınofestıvaline daıyndyq týraly búgin tanymal kınorejısser Rashıd Nuǵymanov aıtyp berdi.
Onyń aıtýynsha, bıylǵy erekshelik festıval formatynyń erkindiginde bolmaq. Kınogerler bıylǵy shara halyqtyq sıpatta ótedi dep otyr. ıAǵnı barlyq kınotýyndylarǵa kirý tegin ári qaladaǵy dámhanalar, meıramhanalar men saıabaqtarda, barlyǵy 20 alańda kórsetilimder júretin bolady. Aıta keteıik, bıylǵy festıval mahabbat taqyrybynda ótedi.
«Festıvaldiń negizgi baǵdarlamasy «Kinopark 11 (Esentaı) IMAX 3D» kınoteatrynda ótedi.
«Negizgi baıqaýǵa 13 kınokartına tapsyryldy. Onyń 3-eýi qazaqstandyqtardyń jumysy. Sonymen qatar, qysqametrajdy 15 fılm usynylyp otyr, onyń 5-eýi otandyq týyndy», - dedi irikteý komıssııasynyń jetekshisi Oleg Boretskıı.
Festıval baǵdarlamasy boıynşa qosymsha alys jáne jaqyn sheteldiń, Qazaqstan men Ortalyq Azııanyń kınogerleri túsirgen 112 fılm kórsetiledi. Onyń 20-sy kóshedegi alańdarda júredi. Tuńǵysh ret festıval aıasynda túrli janrda túsirilgen arab kınolary kórermen nazaryna usynylady. Aıta keteıik, Halyqaralyq kınofestıval «dástúri» boıynsha, derekti fılder men balalarǵa arnalǵan kınolar bıyl da kórsetiledi. Olarǵa arnaıy syılyq taǵaıyndalǵan. Úzdik derekti fılm avtoryna Oraz Ábishev atyndaǵy syılyq tabys etilse, úzdik balalar fılmine Abdolla Qarsaqbaev atyndaǵy syılyq berilmek.
Aıta keteıik, Halyqaralyq kınofestıval Ońtústik Koreıada prokat boıynsha rekord ornatyp úlgergen «Pýsanǵa barar poıyz» kınokartınasymen ashylady.
