X jelisine qatysty tergeý: Eýrokomıssııa jańa sanktsııalar engizbek

ASTANA. KAZINFORM — Eýrokomıssııanyń X jelisin aıyppul salý týraly sheshimge túsinikteme bergen EK-nyń tehnologııalyq sýverenıtet máseleleri jónindegi vıtse-tóraıymy aldaǵy aılarda taǵy birneshe sheshim qabyldanatynyn habarlady.

Eýrokomıssııa iri tehnologııalyq kompanııalarǵa qatysty birneshe tergeýdi jaqyn ýaqytta aıaqtap, X áleýmettik jelisine salynǵan 120 mln eýro aıyppuldan keıin qosymsha sanktsııalar engizýi múmkin. Bul týraly EK-nyń tehnologııalyq sýverenıtet, qaýipsizdik jáne demokratııa máseleleri jónindegi vıtse-tóraıymy Henna Vırkkýnen jýrnalısterge aıtty.

— Kóptegen tergeý boıynsha aldyn ala qorytyndy jarııalandy, endigi qadam — onlaın-platformalarǵa bizdiń talapty oryndatý, — dedi ol.

Onyń aıtýynsha, eger kompanııalar talapty oryndamasa, «erejelerdi saqtamaý týraly sheshim» shyǵarylady, ol aıyppul salýdy da qamtýy múmkin.

5 jeltoqsanda Eýrokomıssııa X áleýmettik jelisin 120 mln eýro kóleminde aıyppulǵa jyqqan edi. Bul — 2023 jyldyń tamyzynda EO-da kúshine engen «Tsıfrlyq qyzmetter týraly» zań talaptaryn buzǵany úshin salynǵan alǵashqy aıyppul.

Eýropalyq retteýshiniń málimdeýinshe, jeli verıfıkatsııalanǵan akkaýnttarǵa arnalǵan «kók belgini» qate qoldanady. Bul paıdalanýshylardyń akkaýntynyń shynaıylyǵyna ári kontenttiń durystyǵyna kúmán týdyrady.

Sonymen qatar, mıkroblog servısi jarnama ashyqtyǵy talaptaryn buzyp, retteýshiler ashyq derekterge qol jetkize almaıdy.

Eýrokomıssııa X kompanııasyna «kók belgige» qatysty erejelerdi túzetý úshin 60 kún, al jarnama ashyqtyǵy jáne derekterge qol jetkizý máselelerin sheshý úshin 90 kún merzim berdi.

Aıyppuldan keıin Ilon Mask Eýroodaqty taratýǵa shaqyrdy.