X jelisindegi aqaýlardan keıin Mask kompanııalaryna kóbirek kóńil bóletinin málimdedi

ASTANA. KAZINFORM – TASS habarlaǵandaı, AQSh kásipkeri Ilon Mask ózine tıesili X áleýmettik jelisinde oryn alǵan iri aqaýdan keıin óz kompanııalaryna barynsha kóńil bólýge nıetti ekenin aıtty.

— Qaıtadan 24/7 rejıminde jumysqa oralyp, konferents-zaldarda, serverlik bólmeler men zaýyt tsehtarynda uıyqtaıtyn bolamyn. X jelisine, jasandy ıntellekt startapy xAI, Tesla kompanııasyna jáne kelesi aptaǵa josparlanǵan Starship zymyranynyń ushyrylymyna barynsha nazar aýdarýym qajet. Biz qazir sheshýshi tehnologııalardy engizip jatyrmyz. Osy aptadaǵy X jelisindegi aqaýlar operatsııalyq úderisterde aýqymdy jaqsartýlardyń qajettigin kórsetti, — dep jazdy Mask óziniń X paraqshasynda.

Downdetector qyzmetiniń málimetinshe, 24 mamyr kúni AQSh-ta shamamen 25,8 myń qoldanýshy X platformasynda aqaý bolǵanyn habarlaǵan. Sondaı-aq mundaı irkilister Ulybrıtanııa, Frantsııa, Japonııa jáne basqa elderde de tirkelgen.

Aıta keteıik, naýryz aıynda Tesla aktsııalary 15%-ǵa quldyrap, bul 2020 jyldyń qyrkúıeginen bergi eń nashar kórsetkish boldy.

Buǵan deıin, sáýir aıynda, Mask Tramp ákimshiliginde az jumys isteımin dep ýáde bergen bolatyn.