X-tiń jańa servısi: Ilon Mask qarjy naryǵyna óz platformasyn shyǵarady
ASTANA. KAZINFORM – X áleýmettik jelisi qarjymen jumys isteýge arnalǵan óz servısin iske qosýdy josparlap otyr. Bul týraly BBC agenttigi habarlady.
Kompanııa ıesi Ilon Mask platformanyń aýdıtorııasyn shamamen 600 mln belsendi qoldanýshy dep baǵalaıdy. Jańa servıs qarjylyq qosymshalar naryǵynda mańyzdy oryn alyp, bolashaqta ámbebap sýperqosymshaǵa aınalýdy kózdeıdi.
Joba tujyrymdamasy Qytaıdaǵy WeChat servısine qarap jasalǵan. Bul platforma baılanys, tólem jáne kúndelikti qyzmetterdi biriktiredi. Buǵan deıin testileýge qatysýshylardyń biri X arqyly banktik karta kómegimen janarmaı quıý beketinde tólem jasaı alǵanyn habarlaǵan.
Ilon Masktyń aıtýynsha, aldaǵy aılarda shekteýli beta-testileý iske qosylyp, keıin servıs búkil álem paıdalanýshylaryna qoljetimdi bolady.
Joba aıasynda platforma qarajat pen qarjylyq quraldardy saqtaýǵa arnalǵan biryńǵaı habqa aınalýy múmkin.
2025 jyldyń qańtarynda X Visa kompanııasymen strategııalyq kelisimge qol qoıǵan. Bul seriktestik fızıkalyq jáne vırtýaldy banktik kartalardy shyǵarýǵa múmkindik beredi. Kartada ıesiniń atymen qatar áleýmettik jelidegi nıkneımdi kórsetý de qarastyrylyp otyr.
Bastapqy usynystar qatarynda jańa paıdalanýshylarǵa 25 dollar bonýs, satyp alýlarǵa keshbek, bank shotyn baılanystyrý múmkindigi jáne depozıtterge jylyna 6%-ǵa deıin tabys qarastyrylǵan. Bolashaqta krıptovalıýta operatsııalaryn ıntegratsııalaý da múmkin.
Sonymen qatar joba halyqaralyq retteý talaptaryn, ásirese Eýropalyq komıssııa deńgeıindegi talaptardy eskerýi tıis. Ótken jyldyń jeltoqsanynda Eýrokomıssııa X platformasyn tsıfrlyq qyzmetter týraly zańdy buzǵany úshin 120 mln eýro aıyppulmen jazalaǵan. Negizgi shaǵymdar qatarynda «kók belgi» júıesiniń jańylystyratyn sıpaty men jarnama qyzmetiniń jetkiliksiz ashyqtyǵy bar.
Degenmen AQSh tarapynan bul sheshim synǵa ushyrady. AQSh vıtse-prezıdenti Djeı Dı Vens bul sharalardy platformanyń tsenzýradan bas tartýymen baılanystyrsa, memlekettik hatshy Marko Rýbıo aıyppuldy amerıkalyq tehnologııalyq kompanııalarǵa qysym kórsetý dep baǵalady.
Buǵan deıin Ilon Masktyń baılyǵy 800 mlrd dollardan asqan alǵashqy adam bolǵanyn jazdyq.
