X Baký halyqaralyq kitap kórmesi Kemel Toqaev kitabynyń tusaýkeserimen ashyldy
BAKÝ. KAZINFORM – Bakýde kórnekti qazaq jazýshysy jáne qoǵam qaıratkeri Kemel Toqaevtyń ázerbaıjan tilinde jaryq kórgen «Erekshe tapsyrma» atty kitabynyń tusaýkeseri ótti, dep habarlaıdy Kazinform agenttiginiń menshikti tilshisi.
Kitap Túrki mádenıeti jáne murasy qorynyń uıymdastyrýymen basylyp shyqty. Tusaýkeser X Baký halyqaralyq kitap kórmesi aıasynda ótti.
Іs-sharaǵa Qazaqstan Respýblıkasy Prezıdentiniń Keńesshisi Málik Otarbaev, Qazaqstannyń Ázerbaıjandaǵy Elshisi Álim Baıel, Túrki mádenıeti jáne murasy qorynyń prezıdenti Aqtoty Raıymqulova, Parlament depýtattary, Ázerbaıjannyń memlekettik qurylymdary men zııaly qaýymynyń ókilderi jáne t.b. qatysty.
Aqtoty Raıymqulovanyń aıtýynsha, túrki áleminiń kórnekti tulǵalarynyń shyǵarmashylyǵyn nasıhattaý Túrki mádenıeti jáne murasy qory qyzmetiniń basty baǵyttarynyń biri sanalady. Osy turǵyda Qor «Túrki áleminiń kórnekti tulǵalary», «Túrki áleminiń ádebı injý-marjandary», «Túrki áleminiń ǵylymı injý-marjandary» sııaqty kitap serııalaryn shyǵaryp jatyr.
«Qazaqtyń kórnekti jazýshysy ári qoǵam qaıratkeri Kemel Toqaevtyń «Túrki áleminiń ádebı injý-marjandary» serııasyna jatqyzylǵan «Erekshe tapsyrma» kitaby qordyń kezekti shyǵarylymy boldy. Kemel Toqaev – túrki mádenıeti men sóz óneriniń damýyna zor úles qosqan adam. Ol jazýshylyq qyzmetten bólek, Qazaqstannyń mańyzdy mádenı jáne áleýmettik máselelerin jaryqqa shyǵara otyryp, jýrnalıstıkamen de aınalysty», - dep atap ótti Aqtoty Raıymqulova.
Memleket basshysynyń Keńesshisi Málik Otarbaev qatysýshylarǵa Qazaqstan Prezıdenti Qasym-Jomart Toqaevtyń atynan qoshemet bildirip, Kemel Toqaevtyń qazaq ádebıetindegi detektıvtik janrdyń negizin qalaǵan jazýshy ekenin atap ótti.
«Onyń árbir jumysy muraǵattyq derekter negizinde jazyldy. Ol óz zamanynyń rýhyn kórsetip, tarıhta umytylmas iz qaldyrdy», - dedi keńesshi.
Málik Otarbaevtyń aıtýynsha, Baký turǵyndary úshin shyǵarmanyń ázerbaıjan tiline aýdarylyp, tusaýkeseriniń kitap kórmesinde ótýi aıryqsha mańyzǵa ıe. Avtordyń qalamynan shyqqan ár shyǵarma bolashaq urpaqqa mura bolyp qalatyn dúnıe.
Ázerbaıjannyń halyq jazýshysy Anar Rzaev Qazaqstanǵa degen súıispenshilik birtýar tulǵa Abaı týraly maqala jazýǵa túrtki bolǵanyn jetkizdi. Baýyrlas qazaq halqyna degen yqylasy erekshe ekenin ataı otyryp, jazýshy Kemel Toqaevtyń shyǵarmashylyǵyna da zor qurmet bildirdi.
Ázerbaıjannyń belgili jazýshysy Chıngız Abdýllaev shyǵarmanyń Ázerbaıjan men Qazaqstan halyqtary arasyndaǵy mádenı jáne ádebı baılanystardy odan ári nyǵaıtýǵa óz úlesin qosatynyn ári oqyrman tarapynan úlken qyzyǵýshylyqqa ıe bolatynyn atap ótti. Ch.Abdýllaev detektıv janrynda jazatyn qalamger retinde Kemel Toqaevtyń kúrdeli de qyzyqty taǵdyryna aıryqsha tańǵalǵanyn atap ótti.
Ázerbaıjan Ulttyq ǵylym akademııasynyń prezıdenti akademık Isa Gabıbbeılı Kemel Toqaevtyń kitabyn ázerbaıjan tilinde basyp shyǵarý oqyrmandarǵa qazaq ádebıeti qaıratkeriniń shyǵarmashylyǵymen ári qaraı jaqynyraq tanysýǵa múmkindik beretinine toqtaldy.
Ázerbaıjandaǵy Atatúrik ortalyǵynyń dırektory akademık Nızamı Djafarov ta kitap týraly oıyn ortaǵa saldy. Ol shyǵarmada keńes dáýirindegi fashızmge qarsy kúres tarıhy keńinen baıandalǵanyna nazar aýdarady.
Mıllı Májilistiń qoǵamdyq birlestikter men dinı uıymdar jónindegi komıtetiniń tóraǵasy Fazıl Mustafa Kemel Toqaevtyń shyǵarmashylyǵy týraly aıta kele, osyndaı is-sharalardy dástúrge aınaldyrýdyń mańyzdy ekenin atap ótti.
Esterińizge sala keter bolsaq, 2023 jylǵy qyrkúıekte Qazaqstannyń Ázerbaıjandaǵy Elshiliginiń uıymdastyrýymen Kemel Toqaevtyń 100 jyldyǵy jáne Ázerbaıjan ádebıetiniń HH ǵasyrdaǵy klassıgi Mır Jalal Pashaevtyń 115-jyldyǵyna arnalǵan «Túrki ádebıetiniń tarlandary» halyqaralyq konferentsııasynda Kemel Toqaevtyń ázerbaıjan tilindegi «Túnde atylǵan oq» atty povester jınaǵynyń tusaýkeseri ótken etin. Qos Memleket basshylary qazaq-ázerbaıjan qatynastarynyń odaqtastyq sıpatyn aıryqsha ataı otyryp, mádenı-gýmanıtarlyq baılanystardy odan ári damytý qajettigine erekshe mán berip otyr.
Prezentatsııaǵa qatysýshylar K. Toqaev shyǵarmalarynyń joǵary kórkemdiligine de nazar aýdardy.
