www.wto.kz aqparattyq saıty iske qosyldy
ASTANA. 15 jeltoqsan. QazAqparat - Qazaqstan Respýblıkasy Ekonomıkalyq damý jáne saýda mınıstrligi Qazaqstannyń DSU-na kirý máseleleri jóninde www.wto.kz aqparattyq saıtyn iske qosty.
QR Ekonomıkalyq damý jáne saýda mınıstrliginiń málimetinshe, saıtta Dúnıejúzilik saýda uıymy týraly, sondaı-aq, osy uıymǵa kirý jónindegi Qazaqstannyń kelissózderiniń barysy jaıly ózekti jáne tııanaqty aqparat usynylatyn bolady. Portaldaǵy aqparat eki negizgi blokta berilgen. Alǵashqy bólim uıym týraly málimetterdi, onyń kelisimderi men jumys júıesin qamtysa, ekinshisinde - kelissózder júrgizilip jatqan baǵyttar, kelissózderdiń aǵymdaǵy jaǵdaılary kórsetiledi.
Aqparatpen QR Ekonomıkalyq damý jáne saýda mınıstrligi janyndaǵy «Saýda saıasatyn damytý ortalyǵy» AQ qamtamasyz etedi.
Internet-resýrsty paıdalanýshylar tıisti taqyryptar boıynsha mamandarǵa suraq qoıyp, tyńǵylyqty konsýltatsııa ala alady.
